Ялна-влак такмак-влак дене чапланат

Ялна-влак такмак-влак дене чапланат

Мероприятийыште 400 утла еҥ участвоватлен – 17 солист ден 37 коллектив. Районын чапшым Изи Накаряк ялысе Культура пӧрт пеленсе «Ручейки ансамбль (Е. Байрамалова вуйлата).

Пайрем Пошкырт кундемын ик эн мотор верыштыже – Новобелокатай селаште эртен. Калык творчество да фольклор шотышто вӱдышӧ методист Рауия Салямовна Саматован мутшо почеш, пайрем руш калык мурым арален кодаш да вияҥдаш виктаралтын. Фестиваль кум кече шуйнен.

Икымше да кокымшо кечын мурызо-влак руш калык муро ден такмак-влакым муреныт. Мероприятий кышкарыште «Традиционная вечерка как форма досуга в современности» мастер-класс эртен. Тудым Кычыриоласе Кокла Урал традиционный калык культура рӱдерын методистше Вячеслав Печняк эртарен, мероприятийым сылне муро-влак дене «Воля» еш фольклор ансамбль сӧрастарен. Кастене площадьыште Руш муро да такмак-влак регион-влак кокласе XV пайрем торжественно почмо деч вара нуно кугу пайрем касым эртареныт.

В. Д. Поленов лӱмеш ГРДНТ-н калык муро искусство отделже вуйлатыше, РФ-н заслуженный артистше, РФ правительствын «Российын чонжо» премийжын лауреатше, жюрин председательже Петр Сорокин «Ручейки» ансамбльын выступленийжым кӱкшын аклен.

Мероприятий кышкарыште руш мурым мурышо коллектив-влак ден нуным вуйлатыше-влаклан мастер-класс эртаралтын, тудым Октябрьский оласе «Щедрый вечер» руш муро калык хор вуйлатыше, тӱнямбал, Россий, республиканский кӱкшытан конкурс-влакын лауреатше Гульнара Хисаева эртарен.

Руш калык муро да такмак пайрем оҥай да йомартле Гала-концерт дене мучашлалтын. Тушто фестивальыште сеҥыше да ойыртемалтше коллектив-влакым палемдыме. Мемнан коллективна пайремын 1 степенян лауреатше лийын, ансамбльым тыгак калык йӱлам аралымыжлан да вияҥдаш полшымыжлан «Башкортостанысе руш собор» общественный организацийын региональный правленийжын тауштыме серышыж дене палемдыме.

«Ручейки» коллектив мероприятийын организаторжо-влаклан, пайремым сайын ямдылымыштлан да эртарымыштлан, Белокатай районын тӱҥ зоотехникше Ирик Галимьянович Хурамшинлан шокшын вашлиймыжлан чон гыч лекше тау мутым ойла.

В. АГЛЯМОВА (материалым РДК-н методистше пуэн).