Ял калыклан полыш

Ял калыклан полыш

Ял калыкын илышыже нигунам куштылго лийын огыл. Ялыште кодшо курымысо дене таҥастарымаште, кызыт пашам ышташ ятырлан куштылгырак манын ойлат гынат, мемнан жапыштат нелылык-влак шуко вашлиялтыт.

Яллаште эше шочмо кундемыште, мландыште пашам ышташ кумылан-влак улыт, но шукыж годым чылан ончылно ик чарак вашлиялтеш - илыме верым чоҥаш але налаш. Сандене ты шотышто государствын полышыжо пеш кӱлешан. Тидын шотышто лудшына-влаклан рашрак умылтарышашлан ме районышто «Башкортостан Республикыште ял озанлыкым вияҥдыме, ял озанлык продукций, сырье да кочкыш сатум виктарыме» государственный программын «Башкортостан Республикысе сельский территорийлам вияҥдыме» подпрограммыжым илышыш пурташ вуйын шогышо ял озанлык отделын тӱҥ экономистше П. Паляев дене мутланена.

- Тачысе кечылан БР-се ял озанлык министерство линий дене граждан-влаклан илыме условийыштым саемдаш могай паша-влак шукталтыт?

- Тачысе кечылан районышто «Башкортостан Республикыште ял озанлыкым вияҥдыме, ял озанлык продукций, сырье да кочкыш сатум виктарыме» государственный программын «Башкортостан Республикысе сельский территорийлам вияҥдыме» подпрограммыже пашам ышта. Тиде программа кышкарыште участник-влак социальный тӱлам налын кертыт. 2018 ийыште тыгай социальный тӱлам мемнан район гыч 11 еш, чылаже 13 миллион теҥге, налын. 2019 ийлан 17 еҥлан, нунын коклаште самырык еш да самырык специалист-влак улыт, тыгай полышым ышташ палемдыме.

- Социальный тӱлам могай пашалан кучылташ лиеш?

- Социальный тӱлам сельский верыште илыме верым налаш, илыме верым чоҥаш але илыме верым (пачерым) пай дене чоҥаш (долевой строительство) кучылташ лиеш.

- Тиде подпрограмма дене кӧмыт илыме верым саемдашлан социальный тӱлам налын кертыт?

- Социальный тӱлам яллаште илыше, илыме верым саемдаш кӱлмӧ радамыш пуртымо граждан, самырык еш да самырык специалист-влак налын кертыт. Нуно паша договор дене але индивидуальный предпринимательский пашам сельский верлаште ыштышаш улыт. Тыгодым илыме верым налаш, чоҥаш шкеныштын 30 процент деч шагал огыл оксашт лийшаш. Тўла тиде подпрограммыште ончыктымо черет почеш пуалтеш.

- Черет могай йӧн дене шотлалтеш?

- Социальный тўлам налаш черет подпрограммын участникшын могай пашам ыштымыже, ешын составше да социальный тӱла могай цельлан - илыме верым чоҥаш але налаш кучылталтме деч шога. Эн ончычак социальный тӱла сельский верыште паша договор дене але индивидуальный предпринимательство семын ыштыше граждан, самырык еш, самырык специалист-влаклан, кудышт ялыште илаш да илыме верым чоҥаш шонат, кумыт да утларак йочашт уло, пуалтеш.

- Тиде подпрограммышке кузе логалаш лиеш?

- Подпрограммышке пурашлан социальный тӱлам налаш келшыше условий лийшаш, чыла документ-влакым поген муниципальный район администрацийыш кондыман да подпрограммышке пурташ йодмашым возыман. Могай документ-влак кӱлмым, тыгак социальный тӱлам пуымо радам нерген те район администрацийын сайтыштыже /Деятельность/ Жилищная программа ужашыште муын кертыда.

Фирдаус КАДИКОВА.