«Виян еҥым поро кумыл сӧрастара»

«Виян еҥым поро кумыл сӧрастара»

Мишкан села деч 45 километр тораште Чорай ялыште участковый больница уло. Тудо 70-ийла тӱҥалтыште чоҥалтын.

Больницыште 5 сельсоветысе 24 ял гыч эмлалтыт. Иканаште 9 еҥым эмлаш йӧн уло, эше 8 еҥ кечывал стационар йӧн дене

эмлалтын кертеш. Тыште тыгак лабораторий, процедурный, перевязочный, прививочный, физкабинет-влак да рентгенолабораторий улыт. Икмыняр ий ончыч тӧра-влак больницам петыраш шоненыт, но калык тыгай уда пашам ышташ эрыкым пуен огыл – эмлыме верым арален коден. Больница пелен вич ий посна «Вашке полыш» бригада пашам ышта.

Больницым ынде 25 ий Олег Ионович Семенов вуйлата. Коллектив пашам ваш келшен, ик ой дене ышта, чыланат тыршат, черле-влакым эмлыме верч жапышт ден вийыштым огыт чамане. Шукын Чорай але пошкудо ялла гыч улыт. Верысе пациент-влакым ару кабинетлаште эре, ош халатым чийыше, поро кумылан врач ден медсестра-влак приниматлат. Чыланат, манаш лиеш, палыме улыт.

Очыни, тидлан кӧра эмлалташ толшо-влакым чылаштымат порын вашлийыт да эре полшаш ямде улыт. Ялласе калыкат нуным пагала да пашаштым акла. Врач ден медсестра-влаклан пашаштым шукташ санитарка, водитель, кочегар, орол-влак да моло полшат.

Чорай участковый больницыште врач-терапевт пашам Роза Ивановна Шаймарданова шукта. Тудын паша стажше уже 44 ий. Мыйын ачам, Кугу Отечественный сарын ветеранже Каникей Камиланович Камиланов, Чорай больницыште эмлалтын толмеке, тыге ойлен: «Роза Ивановна ондак шыргыжалын эмла, вара – поро шомак дене, тылеч вара иже - эм дене». Кызытат тудо тыгай йӧн денак пашам ышта.

Верысе йоча-влакын тазалыкыштым педиатр Оксана Леонидовна Япаева эскера. Тудымат калык пашам сайын ыштымыжлан жапла да пагала. Оксана Леонидовна шкенжын участкышкыже арняш ик гана толеш да йоча-влакым прниниматла. Ме районный газетыште шкенан поро кумылан врач-хирургна, терапевтна, гинекологна, акушерна, онкологна, эндокринологна, психиатрна, невропатологна, офтальмологна, педиатрна да моло специалистна-влаклан тауштымашым чӱчкыдын лудына. Тыгай серыш-влак арам огыл возалтыт.

Вет мемнан врачна-влак мемнам да лишыл еҥна-влакым тӱрлӧ чер дечын эмлат, эсогыл илышнамат арален кодат. Таче мый тау мутым шкенан стоматологна-влаклан ойлынем. Виклан каласем: пӱй кабинетышке лӱдде коштам. Лӱдмашым Мишкан рӱдӧ районный больницыште пӱй кабинетым вуйлатыше Айрат Габрауфович Саитзянов пытарен. Тудо шуко ойлышан огыл гынат, шке пашажым сайын пала. Стоматолог пашам уже 30 ий шукта. Отпускыш кайымыж годым шке олмешыже Роман Николаевич

Николаевым кода.

Ийгот шкенжыным налеш. Ме чыланат тамлым кочкаш йӧратена, но витамин-влак нерген онат шоналте. Тыге кариес, нарынче налет орландараш тӱҥалыт, коклан пӱй шӱтла, каталтеш.

Шукерте огыл икымше гана Чорай больницын стоматологшо Олег Иванович деке мийышым. Тидлан изишат шым ӧкынӧ. Тыште волгыдо да ару.

Пошкудо кабинетыште тудын коллегыже – пӱй врач Лилия Ивановна Шамиева ышта. Лилия Ивановнат пашажым сайын пала, шке вийжылан ӱшаныше да тыматле койышан улеш. Нунылан кеч-кунамат медсестра Ирина Сергеевна Михайлова полшаш ямде улеш. Посна кабинетыште самырык специалист Александр Яныбеков ышта.

Тиде кабинетыште тӱрлӧ процедурым ыштат: пӱйым эмлат, кӱ-влак деч эрыктат, пломбым шындат, пӱйым ошемдат але луктыт. Нунылан чылаштланат тау мутым ойлымо шуеш. Очыни, арам огыл больницын коридорыштыжо стоматолог деке эре черет. Мый изишак пациент-влак дене мутланышым. Иктыже Балтач районысо Ар Мишкан ял гыч улеш улмаш, эше кум пациент – Бурай район гыч. Вес гана мийымем годым Караидель да Пӱрӧ районласе ўдырамаш-влак дене палыме лийым. Шукынжо, конешне, Чорай да пошкудо ялла гыч улыт.

Мый ик медицинский журналыште тыге возымым лудынам ыле: «Тӧр да таза пӱй тазалыкын да сай илышын символжо улыт». Мый авторын ойжо дене тӱрыснек келшем да кажне айдемылан таза да мотор пӱян лияш тыланем.

Мый тымык да поро шӱлышан Чорай участковый больницыш пурен лекмеке, чонемлан сайрак лие. Пытартыш жапыште илыш

тӱрлӧ шӧрынан гынат, тиде больницыште алал кумыл, ваш умылымаш, пациент-влакым пагалымаш озаланат. Тидлан кӧра

Чорай участковый больницыште ыштыше-влаклан чылаштланат таза-эсенлык ден пиалан илышым тыланем.

Рита ЯЛАЕВА.