Весела да пайдале кеҥеж каныш

Весела да пайдале кеҥеж каныш

Кеҥежын икымше кечынжак Йылыш школышто «Кечыйол» лагерь йоча-влакым иквереш чумырен. Тушто 35 ӱдыр-рвезе канен. Тений мемнан школ икымше гана марий шўлыш направлений дене пашам ыштен. Воспитатель-влак С. Аймурзина, Р. Саликаева да лагерьын начальникше М. Аплекова воспитательный программым ямдылышна, тушко марий калыкын пашаже, йӱлаже, пайремже, модышыжо да тулеч моло тӱрлӧ мероприятий-влакым пуртышна. Лагерь изи мӱкш омартала гӱжлен, вет тыште кажне кечын шке программыже ыле: Марий Эл гыч толшо самырык артист-влак дене вашлиймаш, Колызын кечыже, Изи шӱдыр, Модыш аршаш, Муро аланыште, Мый йомакзе улам да тулеч моло. Тыгак лагерьыштына Благовещенский педагогический колледжын студенткыже А. Аплекова шке вийжым терген. Тудо ятыр оҥай мероприятийым, «Самырык сӱретче» да «Муро аланыште» кружок-влакым эртарен. Йоча-влаклан «Палем мо мый шочмо йылмемым?» викторине, «Юзо пасу» модыш, Семык пайрем, «Тушто кугыза дек унала» модыш, «Шуктет гын ойӧрым, илышет лиеш куштылго» беседе, «Лач пыр- ляште весела» этнодискотеке поснак чот келшеныт.

Лагерьын пытартыш кечыштыже воспитатель-влак иктешлымаш семын «Марий сандалыкыште» модмашым эртарышт. Лагерьым кок командылан пайлыме. Кажне команде ончылгочак шкаланже лӱмым, эмблемым ямдылен. Ӱдыр-рвезе-шамыч «Рушла гыч марлаш кусаре», «Туштым пале», «Ир кайыквусо ден янлык-влак», «Мутышто могай вес мут-влак шылыныт» да моло конкурслаште шинчымашыштым ончыктеныт. Конкурсла коклаште Иванкин Алексей гармонь дене марла семым шоктен, а Исеметова Вероника ден Саликаева Ангелина «Кечыйол» мурым мурен йолташ-шамычыштым куандареныт. Икманаш, лагерьыш коштшо йоча-влак шке жапыштым оҥайын да пайдалын эртареныт. Лагерьыште пашам ыштыше да каныше-влакым образований отделын методистше А. Килинбаева лагерьын пытартыш кечыж дене саламлыш да тыланен кодыш тазалыкым, сай канышым.

Мемнан школышто тыгай пашам эртарашак кӱлын, пытартыш жапыште ялысе изи йоча-влак шукыжым рушла кутыраш тӱҥалыныт. Чыла нине мероприятий-влак гоч ӱдыр-рвезе-шамыч шуко марий мут-влакым, марий йӱлам да модыш-влакым пален налыныт.

М. АПЛЕКОВА, Йылыш школ.