Урок-влак расписаний ок вашталт

Урок-влак расписаний ок вашталт

6 апрельыште районысо чыла школ-влак йоча-влакым дистанционный йӧн дене туныкташ тӱҥалыныт. Сергей Андреевичын мутшо почеш, образовательный процесс ныл йӧн дене эртен кертеш.

- Тӱҥалтыш класслаште, кудыштын ача-авашт тӱрлӧ амаллан кӧра суртыштышт шинчен огыт керт, школ пеленсе дежурный группа-влакым ышташ лиеш, но тыгай группышто 15 йоча деч шукырак лийшаш огыл. Районыштына тыгай группа-влак укелыт.

- Онлайн урок-влак. Тидлан интернетыш пураш келшыше йӧн кӱлеш – тудо писе лийшаш да кӱрылтшаш огыл. Онлайн-урокым туныктышо суртшо але школ гычын эртарен кертеш. Онлайн-режим дене урок-влак 10.00 шагатлан тӱҥалыт.

- Электронный кейс-влак полшымо дене дистанционно туныктымаш. Тыгай йӧн интернетын писылыкше уда да кӱрылтшан улмыж годым кучылталтеш. Тиде йӧн дене туныктымо годым заданий-влак электронный почта але сообщений гоч колталтыт.

- Нылымше йӧн тугай илем-влаклан, кушто сото кылат уда, интренетат уке. Тыгай илемлаште илыше йоча-влакым интернет-технологий-влаклан эҥертыде туныктат. Йоча-влаклан суртышкышт заданий-влак дене кагаз кейс-влакым намият. Тунемше нуным ыштымеке, туныктышо заданий-влакым тергаш миен налеш.

Тунемме годым тидлан лӱмын ыштыме Интернет-ресурс-влак дене пайдаланыман. Мутлан, Башкортостан Республикысе электронный образований портал дене.

Урок-влак расписаний огеш вашталт. Тунеммаш республик мучко ик жапыште – 10.00 шагатлан тӱҥалеш. 9 да 11 класслаште тунемше выпускник-влаклан.

Выпускной класслаште тунемше-влакым государственный итоговой аттестацийлан ямдылаш «Подготовка к ЕГЭ» курс ямдылалтын. Тунемаш темлыме образовательный ресурс-влак: Портал электронного образования Республики Башкортостан, Яндекс. Учебник, Виртуальная школа Сбербанка, «Учи.ру», «ЯКласс», «Российская электронная школа» да моло.

Тунемше-влакым шокшо кочкыш дене пукшымаш. Мишкан районышто школышто тугок кочкаш праван йоча-влаклан продуктовый наборым шалаташ тӱҥалыт. Ача-ава-влак нуным школышко миен налшаш улыт. Нуным пуымо режим ден графикым школ-влак посна рашемдат. Продуктовый набор арняш ик гана пуалтеш. Тидын шотышто рашрак информацийым верысе школышто налаш лиеш.

БР-се образований да наука министерствын дистанционно туныктымо шотышто шокшо линийын телефонжо: 8(347)292-211-5.

В. АГЛЯМОВА.