Уло кумылын муреныт да куштеныт

Уло кумылын муреныт да куштеныт

Кок шагат наре залыште йоча-влакын мурымашышт ден куштымашыштым кумылын онченыт.

«Калейдоскоп» куштышо образцовый коллектив (вуйлатыше Марина Васильевна Яшкина) да «Ладушки» вокальный образцовый

коллектив (Надежда Валериевна Иванова) сценыште выступатлен тунемыныт: районысо ик кугу мероприятият нунын выступленийышт

деч посна ок эрте. Республика кӱкшытыштат чӱчкыдынак дипломант, призер, лауреат лӱм-влакым налыт.

Сандене нунын выступленийышт годым районысо Культура дворецын залыштыже еҥ эре тич лиеш. Мутат уке, эн ончычак сценыште выступатлыше йоча-влакын ача-авашт, коча-кувавашт, йолташышт-влак ончаш мият.

- Кок колллективыште гына - кугурак, кокла да изирак группылаште - 150 наре йоча заниматлалтеш, - ойла ДШИ-н директоржо С. Ямбаев. - Мемнан деке изинекак кошташ тӱҥалыт, а школым тунем пытарымеке, ешартыш образованийым налме нерген свидетельствым кучыктена. Можо куандара, мемнан ятыр выпускникна варажым музыкальный профессийым налыт да шкешт йоча-влакым мураш да кушташ туныкташ тӱҥалыт.

Выступленийлан репертуарым вуйлатыше-влак шкешт ойырат, южгунам шкештат куштымаште участвоватлат. Тиде гана «Маша и Медведь» куштымаште Марина Васильевна Маска рольым шке куштен.

Концерт мучаште сценышке район администраций вуйлатышын кадр да социальный йодыш-влак шотышто заместительже Л. Александрова лектын.

- Те чынжымак молодец улыда, ме тендан дене кугешнена, - каласен тудо мучашлан.

- Мый йоча искусство школын туныктышыжо-влаклан, РДК пашаеҥ-влак М. Салимовлан, А. Галимовалан, Р. Галимовлан, А Крутовлан, И. Яхинлан, Р. Каниевлан, И. Имаевалан тиде концертлан ямдылалташ да тудым эртараш полшымыштлан кугу таум каласем, - манын ДШИ директор Сергей Ямбаев.

Концерт кужунрак шуйнен гынат, ончаш мийыше-влак РДК гыч сай кумыл дене мӧҥган-мӧҥгышкышт шаланеныт.

Р. S. 27 мартыште “Калейдоскоп» куштышо коллектив Туймаза олаште эртыше «Келшымаш хоровод» йоча куштышо коллектив-влак конкурсыш каяш ямдылалтеш.

Венера АГЛЯМОВА.