У ий мемнан деке вашка

У ий мемнан деке вашка

Илышыште шуко парадым ужынам - военный, шўдыр-влак, модель-влак… а Йўштӧ кугыза ден Лумўдыр-влакын парадышкышт икымше гана логалынам.

Тиде мероприятийым райцентрыште самырык-влак организоватленыт. Тушто кумылан кажне еҥ участвоватлен кертын. Лач келшыше вургемым, саламлыме ойым ямдылаш да ончышо-влакым веселитлен мошташ кўлын. Ийготын могай улмыжат чаракым ыштен огыл. Условий икте гына лийын - погынышо калыкым веселитлен моштымаш.

Культура дворец ончылсо площадке йомак чодырашке савырнен. Йырым-ваш гирлянда волгалтара. У ий муро-влак йоҥгалтыт. Сандене ты пайрем сӧрал лийшашым сӧрен.

Иканаште индеш Йўштӧ кугызам ужаш оҥай лийын. Адакшым нуно тўрлӧ йылме дене мутланеныт. Мутлан, Кўшыл Шогертен гыч толшо Йўштӧ кугыза ден Лумўдыр марла У ий мурым муреныт да погынышо калыкым марла саламленыт. Шомакыштым чыланжак умылен огытыл гынат, совым рўж кырен вашлийыныт да ужатеныт.

Кигазытамак гыч кок Йўштӧ кугыза да Санта Клаус толыныт. Нуно йоча У ий мурым туге сылнын йоҥгалтареныт, кажне еҥ шке йоча жапшым шарналтен.

Эн чот мурышо да куштышо Йўштӧ кугыза ден Лумўдыр рўдӧ библиотечный система гыч толыныт. Кузе нуно погынышо-влакым мурыктен-куштыктеныт - ончен куанет.

Агропромышленный колледжын Йўштӧ кугызаж ден Лумўдыржє моткоч весела дискотекым эртареныт. А нуным кумылаҥдыше-влак шукын лийыныт, вет колледжын студентше-влак шке У ий геройыштым моткоч чот йєратат. Шкештат яра шоген кертын огытыл, моло-влакымат кушташ таратеныт.

«Чын педагог артист лийшаш» маныт. «Ласточка» ден «Родничок» йоча садла гыч Йўштє кугыза ден Лум- ўдыр-влак тидым эше ик гана пеҥгыдемденыт.

«Воштылат - таза лият» - тыгай девиз дене выступатленыт рўдє районный больница гыч Йўштє кугыза ден Лумўдыр. Нуно пўсє мыскара дене калыкым куандареныт.

Кемий гыч Йўштӧ кугыза ден Лумўдырым тўрлӧ екысуко-влак ужатен толыныт. Нуно тичмаш театрализованный представленийым ончык- теныт.

Пайрем пеш оҥай лийын. Теве иктешлымашым ышташ жап шуын. Лектыш тыгай лийын: Кигазытамакын, рўдє районный больницын да агропромышленный колледжын Йўштӧ кугызаштлан участвоватлымылан дипломым пуымо, йоча сад-влак гыч толшо-влак кумшо вер дене палемдалтыныт, Кемий да Кўшыл Шогертенын унашт-влак кокымшо лийыныт, а икымше вер рўдӧ билиотечный системылан логалын. Кажне участник дипломым да бассейныш мияш сертификатым налын.

Ончаш толшо-влакат пӧлек деч посна кодын огытыл. Кумылан-влаклан кож ден пўнчӧ-влакым тугок шалатеныт.

Венера АГЛЯМОВА.