Цифровой ТВ - жапын йодмашыже

Цифровой ТВ - жапын йодмашыже

Теве ынде мемнан республикыланат черет шуын. 2019 ий 3 июльышто Российын 57 регионыштыжо аналоговый телевиденийым йӧртат. Мемнан республикат тиде радамыш пура. Мутат уке, цифровой ТВ-н сай могыржо шуко. Кажне еҥ 20 каналым тугок ончен кертеш. Тидлан посна тӱшкаш пурышо-влаклан льгота палемдалтын. Республика вуйлатышын пашажым шуктышо Радий Хабировын кӱштымыж почеш пенсийышке федеральный социальный тӱлам налше-влаклан да йочалан пособийым налше шуко икшыван еш-влаклан цифровой приставкым налме роскотым пӧртылтат, а могай верыште цифровой телевиденийым кучаш ок лий, тушто спутниковый антенным шындат. Цифровой телевиденийын качествыже шотышто кӧ деке лекман? Цифровой приставкым, антенным кузе настроитлаш? Мемнан республикыште цифровой телевиденийын качествыжлан ФГУП РТРС РТПЦ РБ филиал мутым куча. Консультационный рӱдерын специалистше-влак чыла йодышлан тыгай телефон дене раш вашмутым пуат: +7 (347) 246-45-78. Федеральный «шокшо линий» - 88002202002.

Вес йодыш: кӧлан государственный полыш ок логал гын, кузе лияш? Цифровой сигнал логалдыме верлаште илыше-влаклан спутниковый оператор-влаклан 20 каналым тугок ончыкташ кӱштымӧ нерген федеральный законым лукмо.

- Кӧ кызыт тарелка дене телевизорым онча, тудо абонплатым тӱлымым чарнен кертеш мо?

- Кертеш. Тидлан шкендын спутниковый оператор деке лекман да тугок канал-влакым кузе ончаш лиймым рашемдыман.

- Иктаж-могай йодыш лектеш гын, кӧ деч йодман?

- Башкирийыште пенсийышке федеральный тӱлам налше пенсионер-влаклан да йочалан тылзе еда пособийым налше, шагал парышан еш-влак, кудышт цифровой сигналым налдыме верыште илат, печать да массовый информаций шотышто агенство мутым куча. Спутниковый телевизионный оборудованийым шындыше операторлан «СпутникТелеком» АО шотлалтеш. Тарелкым шындыме шотышто йодыш лектеш гын, БР-се печать агенствыш тыгай телефон дене йыҥгыртыман: 8 800 347 00 55, «СпутникТелеком» АО-н телефонжо: 8 347 200 90 93.

Цифровой телесигнал улмо верыште илыше, пенсийышке федеральный тӱлам налше-влакын, йоча пособийым налше шагал парышан еш-влакын проблемышт лектеш гын, тидлан Башкортостан Республикысе еш, паша да калыкым социально аралыше министерство мутым куча. Тудын телефонжо: 8 347 282 40 35.

Мемнан районышто цифровой сигнал логалдыме ял-влак: Корак, Пайтара, Терекей, Йошкар Памаш, Кигазытамак, Ленинский, Арзамат да Накаряк.

Нине яллаште спутник тарелка-влакым Мусин ИП (Чишма поселок) шында.

Вениамин КОНДОГИН.