Тенийсе грипп мо дене лӱдыкшӧ?

Тенийсе грипп мо дене лӱдыкшӧ?

Тений А ден В типан грипп вирус-влак шарленыт. Нуно осал улмышт да айдемым вашке пызырымышт дене ойыртемалтыт. Организмыш логалме деч вара нуно писын шарлат. Айдемын температурыжо кӱчык жапыште, коклан уже икмыняр шагат гыч 38 градусым эрта. Тудым чытырыкта, вуйжо, йыжыҥже-влак коршташ тӱҥалыт, вийже йомеш, кокыраш тӱҥалеш. Южо еҥ, конешне, тынаре ок йӧслане, но грипп дене черланен колышо-влакат улыт. Вет грипп организмышке моло бактерий-влаклан пураш йӧным ышта да айдемын тазалыкшым палын лунчырта.

Грипп мо дене лӱдыкшӧ? Грипп тӱрлӧ черлан вияҥаш йӧным ыштымыж дене лӱдыкшӧ улеш. Мутлан, грипп деч вара ятыр еҥ пневмоний, бронхит дене черлана. Эн шуко еҥ лач грипп деч варасе пневмоний дене черланен кола. Тыгак тыгай чер-влак вияҥын кертме лӱдыкшӧ лектеш: отит, синусит, ринит, трахеит (шодо, логар орган-влак), миокардит, перикардит (шӱм дене кылдалтше чер-влак) да моло. Грипп тыгак хронический моло черымат тарвата.

Грипп дечын кузе аралалтман? Тидым ышташ специфический да специфический огыл йӧн-влак улыт. Гриппым ончылгоч кораҥдаш

полшышо специфический йӧн – вакцинаций. Тидым чер шарлыме деч ончыч ыштыман.

Специфический огыл йӧн-влак: черле еҥ-влак дене кылым кучымым чарнымаш, еҥ шуко погынымо верлаште шагалрак лияш

тыршымаш, медицинский маскым чийымаш, кидым шовын дене мушмаш, пӧртым мушкын шогымаш, свежа южым пуртымаш, таза илышым илымаш (сайын малымаш, сайын кочмаш, чолга лиймаш).

Тыгак, врач-влак рецептым возен пуеныт гын, иммунитетым пеҥгыдемдыше тӱрлӧ препарат-влакым приниматлаш лиеш. Грипп дене черланенда гын, мом ыштыман?

Черланенда гын, суртыштак кодман да врачым ӱжман. Шке йӧн дене эмлалташ ок лий. Могай эм дене эмлышашым врач гына

рашемден кертеш. Врачын кӱштымыжым чыла тӱткын шуктыман: эмым жапыштыже йӱман, кийыман. Вет грипп айдемын шӱмжӧ ден моло органже-влаклан кугу нелылыкым ышта. Тыгак шукырак йӱаш тыршыман: шокшо чайым, кугывӧчыж, пӧчыж морсым, минеральный вӱдым. Южгунам матрушкат гриппым лушташ полша. Инфекций ынже шарле манын, черле еҥым таза еҥ-влак дечын кораҥдыман, йӧн уло гын, посна пӧлмам ойырыман. Черле еҥ кийыме пӧлмашке свежа южым пуртен шогыман, пӧртым дезифицироватлыше средства-влак дене мушман. Черле еҥ воктеке медицинский маскым чиен лишемман.

А. КИЛИНБАЕВА.