Тений 9 класслаште тунемше-влак ОГЭ-м руш йылме да математика дене гына сдатлат

Тений 9 класслаште тунемше-влак ОГЭ-м руш йылме да математика дене гына сдатлат

- Латикымше класслаште тунемше-влаклан экзаменым сдатлыме жап, очыни, кусаралтеш. Но тунемаш пурымо шотышто тургыжланышаш уке: тунемме заведений-влак документ-влакым 10 август марте налаш тӱҥалыт, - каласен Айбулат Хажин.

Тылеч посна, министр увертарен: 11 апрель гыч выпускник-влаклан БР-се электронный образований порталыште онлайн-консультаций эртаралташ тӱҥалын. Тушто занятий-влакым республикысе эн сай туныктышо-влак эртараш да экзаменационный заданий-влакым ышташ туныкташ тӱҥалыт.

Ача-ава ден туныктышо-влаклан онлайн лекций годым спикер-влак респбликыштына дистанционно туныктымаш пашам акленыт. БР-се «У школ» партпроектын координаторжо Раиль Асадуллинын мутшо почеш, кум кече туныктымо жапыште ятыр ситыдымашым рашемдыме. Мутлан, технологический платформа ятыр еҥлан лекцийым колышташ йєным ышташ ямде лийын огыл. Тидлан кӧра ятыр урокым эртараш йӧн лийын огыл. Ситыдымаш-влак техника дене пайдаланыме, расписанийым келшытарыме годымат лектыныт.

- Мемнан лекцийна-влакым колыштын, туныктышо ден ача-ава-влак практический информацийым налыт. Нунын ончылно гаджет-влак улыт. Онлайн режимыште нуно тӱрлӧ платформа дене пашам ышташ тунемыт да тӱрлӧ йодышым пуэн кертыт, - палдарен Раиль Асадуллин.

Педагогический наука доктор Иван Сергиенко онлайн связь нерген ойлен: Скайп да Discored сайт-влак дене пайдаланаш туныктен.

«Единый Россий» партийын региональный исполкомжым вуйлатыше Рустем Ахмадинуров палемден: тыгай жапыште тунемше-влакын тунемаш кумылыштым нӧлталаш тыршыман. БСТ телеканалыште кажне кечын икымше классыште тунемше-влаклан урок-влак эртаралтыт. Урок-влакым Башкирийысе эн сай тунемше-влак эртарат. Тылеч посна лӱмлӧ еҥ-влак дене вашлиймаш-влак организоватлалтыт. Мутлан, икымше урокым республик вуйлатыше Радий Хабиров эртарен.Тунемше-влак деке, кудыштын келшыше техникышт ден интернетышт уке, арняш кум гана кагаз кейсым намияш тӱҥалыт. Тунемше-влак заданий-влакым шке вийышт дене ыштат да туныктышылан тергаш пуэн колтат.

- Икымше арня – ситыдымаш-влакым рашемдыме да йоҥылышым тєрлымє арня. Умакыже туныкташ йӧнанрак лиеш, - каласен Айбулат Хажин.

Раиль Асадуллин ешарен: ача-ава ден туныктышо-влаклан онлайн лекций-влак кажне арнян вӱргече еда эртаралташ тӱҥалыт. Нуным партийын региональный отделенийжын Ютуб-каналыштыже ончаш лиеш. Туштак эртыше лекций-влакым ончаш йӧн уло. Йодыш лектеш гын, йодышымат пуаш лиеш.

В. КАМИЛЯНОВ ямдылен.