+13 °С
Облачно
Увер
31 Декабря 2020, 21:00
Таза илыш верч
22 ий ончыч Башкортостан Республикысе образований министерствын инициативыже да Калык образований профсоюз рескомын полшымыж дене «Образований пашаеҥ-влакын тазалыкышт» икымше спартакиада эртен. Ты жап гыч тыгай мероприятийым эртарымаш поро йўлашке савырнен.
Таза илыш верч
Тений таҥасымашым эртараш чапым мемнан районлан пуымо. Вет Мишкан район ятыр лӱмлӧ спортсменым - паралимпийский чемпион, марафонец, куштылго атлет да ечызе-влакым куштен.
Таҥасымаш деч ончыч Аскын, Караидель, Бурай, Балтач, Татышле да Мишкан районласе спортсмен-влакым Мишкан район МР вуйлатыше Рустам Мусин саламлен. Тудо кажне спортсменлан сайын выступатлаш да, чыланат сеҥышыш огыт лек гынат, алал кумылан кодаш тыланен.
Район вуйлатыше деч вара салам шомакым районысо образований отдел вуйлатыше С. Александров ойлен. Сергей Андреевич спортсмен-влаклан таза илышым илаш тыланен. Вет спорт дене кыл туныктышо-влаклан пашаштым сайынрак ышташ кумылаҥда.
Саламлымашке тыгак таҥасымашын тӱҥ судьяже Николай Зайнетдинов ушнен. Николай Анатольевич икымше спартакиадым огыл судитла. Но тиде спартакиада поснак тӱткӧ лияш йодеш. Вет спартакиадыште судитлаш веле огыл, тыгак спортсмен-влакым вашлияш, вераҥдаш, таҥасымаш-влакым ямдылаш кӱлын. Но чылажымат кӱлеш семын ыштыме. Уна да спортсмен-влакын мутышт почеш, спартакиада сайын эртен. Тудо волгыдо да йомартле пайремыш савырнен манына гынат, йоҥылыш она лий.
Спартакиадыште сеҥыше да ойыртемалтше-влакым медаль да шергакан пӧлек дене палемдыме.
Вениамин КОНДОГИН.
