Тачанан кечыж дене!

Тачанан кечыж дене!

Тачана кечын лўмжӧ христиан юмыйўла дене кылдалтын. Легенда почеш, ожно Юмылан ўшаныше тыгай лўман ўдырамаш илен. Тудым шукынжо

шнуй ўдырамашлан шотленыт.

1755 ийыште императрица Елизавета лач тиде кечын Российыште икымше – Моско оласе университетым почмо нерген пунчалым подписатлен. 1791 ийыште тиде тунемме заведенийын флигельыштыже шнуй Тачана лўмеш студент черкым почыныт. Тыге 25 январь ондак Университет почмо кече лийын, варажым – Студент кечыш савырнен.

Совет жапыште тиде пайремым палемдаш чарыме. Российышке Студент кече 1992 ийыште пєртылын, а 2005 ийыште Студент кече государственный пайрем-влак реестрыш пурталтын.

Пайрем кече вашеш ме кызытсе студент илыш нерген УГНТУ-н 3-шо курсыштыжо тунемше Лиана Аглямова дечын палдараш йодна.

- Мый УГУЭС-ыште тунемам, тудо кызыт УГНТУ-ш пура. Рашрак лияш гын, экономика да сервис институт, «Туризм, унагудо да ресторан сервис» факультет, «Туроператорский да турагентский услуга-влак технологий ден организаций» направлений.

Тиде направлений дене тунемаш кумылан-влаклан палдарем: университетыш пурымо годым руш йылме, обществознаний да историй дене ЕГЭ-н результатше-влак шотыш налылтыт.

Университетым тунем пытарымеке, туризм сферыште пашам ышташ тўҥалына: гид, экскурсовод лийын. Магистратурыш пурымеке, университетыште туныктышо, турагент, туроператор лийын ышташ лиеш. Рашрак каласаш гын – туризм шотышто менеджер лийын.

Сайын тунемат гын, тўрлӧ олимпиада, конференций, конкурслаште участвоватлаш йӧн лектеш. Кафедрыштына тунемше студент-влак идалык еда «Студент-влак эрыкан предпринимательствыште» тўнямбал конкурсышто вузын представительже лийыт. 2017, 2018 ийыште региональный этапыште сеҥымеке, командына шкенжын проектшым Моско олаште российский этапыште ончыктен. Тўрлє форумышко сайын тунемше кажне студент логалын кертеш. Тыге, 2018 ийыште мылам элыштына туризмым вияҥдыме шотышто 2 форумышко мияш пиал шыргыже.

Октябрь тылзыште Самара олаште «Волга ўмбалсе йўд» промышленный туризм шотышто II всероссийский форум эртен. Тушто пўтынь Россий гыч студент-влак кум кече шинчымаш ден опытым погеныт. Форумын участникше-влак регионын промышленностьшо дене палыме лийыныт, уна-влаклан омсаштым Самара областьысе тўрлє предприятий-влак почыныт. Тыгай экскурсий-влак ўдыр-рвезе-влакым завод-влакын пашашт дене палдареныт, специалист-влак дечын технологический процесс нерген палаш йӧным ыштеныт.

Форум мучаште кундемысе предприятий-влак нерген репортаж, фоторепортаж, видеосюжет сынан 40 утла публикацийым ыштыме. 22 гыч 24 ноябрь марте Кечывалвел Уралын рўдӧ олаштыже – Челябыште «Чын гына» всероссийский студент форум эртен. Тушто погынышо-влак элыштына самырык туризмым вияҥдыме нерген чыным гына ойленыт. 3 кечаш форумышто тўрлє проект-влакым ыштыме, самырык туризмым вияҥдыме корным рашемдыме.

Студентна-влак идалык еда практикым Уфа оласе да республикысе тўрлӧ турфирма, санаторно-курортный учреждений, унагудо да ресторанлаште эртат. Моло кундемлашкат мият. Практикым тыгай направлений-влак почеш эрташ лиеш: Болгарий, С.-Петербург-Финляндий-Швеций, Сочи, Российын шӧртньӧ оҥгыжо.

Студент кечын да пайрем кече вашеш УГНТУ-што импровизированный пайрем площадка-влак организоватлалтыт: 24 январьыште – УГНТУ-н 8-ше

корпусыштыжо (Орджоникидзе лўмеш культура пӧрт) Россий студент кечылан лўмлалтше торжественный мероприятий эрта, 25 январьыште – УГНТУ-н 4 площадкыштыже (1-ше, 3-шо, 5-ше, 12-шо тунемме корпуслаште) тўрлӧ конкурс ден викторина-влак эртаралтыт. 12-шо корпусышто - викторина ден квест-влак.

Икманаш, тыршен тунемына да йомартлын канена! «Студент олашке» миеда гын, чылажымат ужыда

P.S. Тачанан кечым Российыште 700 тўжем утла студент палемда. Статистика Российыште мыняр Тачана улмо шотышто данныйым ок пу. Туге ганат, студент ден Тачана-влакым чылаштымат волгыдо да йомартле пайремышт дене саламлена да илышыштышт шуко-шуко сайым тыланена!

Венера АГЛЯМОВА.