Шоно, ыште, ойыро!

Шоно, ыште, ойыро!

Форум самырык-влаклан лӱмлалтын, вет Российын ончыкылыкшо лач нунын кидыште. Мероприятийым Мишкан район администраций организоватлен, а Мишкан рӱдӧ районный библиотечный система, районысо «Самырык гвардий» отделений, МР совет пеленсе молодежный совет, районысо самырык депутат-влак ассоциаций партнер семын выступатленыт.

Форумын пашаштыже Мишкан район МР администраций вуйлатыше Р. Мусин, район администраций вуйлатышын кадр да социальный йодыш-влак шотышто заместительже Л. Александрова, Калыклан паша верым ситарыме шотышто йўдвел кундемысе район-влак кокласе рўдер ГКУ-н Мишкан районысо отделжын вӱдышӧ инспекторжо Т. Апакетова, Калыклан паша верым ситарыме шотышто йӱдвел

кундемысе район-влак кокласе рӱдер ГКУ-н Мишкан районысо отделжын инспекторжо Л. Легостаева, рӱдӧ библиотечный системын директоржо Т. Кондогина, самырык депутат-влак ассоциаций вуйлатыше, Мишкан сельсовет СП вуйлатыше Р. Ишмакаев, муниципальный район совет пеленсе самырык-влак советын председательже Р. Плотников, Башкортостаныште мусульманка-влак ушемын председательже Р. Халикова, Россий МВД-н Мишкан районысо отделын уголовный розыск отделенийын оперуполномоченныйже Е. Исакаев, волонтерный движенийын Пўнчер да Ирсай ялласе кураторышт В. Янгуатова ден Л. Саляева участвоватленыт. Форумышко тыгак районысо школлаште тунемше эн чолга ӱдыр-рвезе-влакым, агропромышленный колледжын студентше-влакым, пашам ыштыше самырык-влакым, самырык депутат-влакым ӱжмӧ.

- Тыгай площадка-влак самырык-влакын инициативыштыштлан полшаш, самырык-влаклан шке верым муаш, нунын шинчымашыштым да илыш кӱкшытыштым нӧлталаш кӱлыт, - каласен шке выступленийыштыже муниципалитетым вуйлатыше Р. Мусин. Тудо районын, самырык-влак советын шумо сеҥымашышт, нунын пашашт нерген раш каласкален.

Волонтерын идалыкшым иктешлыме почеш Башкортостан Республикысе государственный молодежный политикым илышыш пуртымаште ойыртемалтше да кӱкшӧ профессиональный мастарлыкым ончыктымылан наградитлалтыныт: БР молодежный политика да спорт министерствын Почетный грамотыж дене молодежный отделын тӱҥ специалистше О. Биктубаева, волонтер движенийын Пӱнчер ялысе кураторжо В. Янгуатова; БР молодежный политика да спорт министерствын Тауштыме серышыж дене Мишкан селасе 1 №-ан лицей директорын заместительже Г. Алексеева, волонтер-влак движенийын Кемий ялысе кураторжо Е. Шамиданова, Арзамат ялысе кураторжо С. Муллашева. Форумын тӱҥ дискуссионный площадкыжлан район вуйлатыше Рустам Мусин дене иктӧр кӱкшыт гыч мутланымаш лийын. Самырык-влак район администраций вуйлатышылан тӱрлӧ йодышлам пуэныт да нуным кузе решатлаш лийме идей-влакым ойленыт.

Мероприятийын пленарный ужашыштыже Калыклан паша верым ситарыме шотышто йӱдвел кундемысе район-влак кокласе рӱдер ГКУ-н Мишкан районысо отделжын вўдышє инспекторжо Т. Апакетовалан мутым пуымо. Тудын выступатлыме темыже - «Профессийым ойырен - илыш корным ойырена».

Школым тунем пытарыме да образованийым налме деч вара самырык-влак ончылан пеш неле йодыш шогалеш - кушко тунемаш каяш, могай профессийым ойыраш, тиде профессийым ойырен, мый чын ыштенам мо? Таче паша рынкыште илышлан кӱлшӧ специалист-влак кӱлыт. Тидын нерген погынышо-влаклан Татьяна Вячеславовна ойлен.

«Пашам легально ыштымаш. Паша договор» - тыгай тема дене выступатлен Калыклан паша верым ситарыме шотышто йўдвел кундемысе район-влак кокласе рӱдер ГКУ-н Мишкан районысо отделжын инспекторжо Л. Легостаева. Ляля Низамовна «ош» пашадар ден «шем» пашадар кокласе ойыртем, айдемын пенсий ийготыш шумекыже тудын лектышыже могай лийме нерген раш умылтарен.

Самырык-влак йоҥылыш корныш ынышт тошкал, кузе чын корным налаш кӱлмӧ нерген Уфа оласе «Ихлас» мечетьын педагогшо-мугалима Р. Халикова ойлен.

«Увертаре, кушто колымашым ужалат» Россий кумдыкышто эртарыме акцийын результатше нерген полиций лейтенант Е. Исакаев палдарен. Форумын практический ужашыштыже тематический площадке-влак пашам ыштеныт. Рвезе-влак тушто проектым ыштеныт да тудым араленыт. Икымше команда районышто йоча-влаклан кеҥеж канышым организоватлыме темым налын. Рашрак каласаш гын, райцентрыште йоча-влаклан да селан унаже-влаклан канаш чыла йӧным ыштышашлан каныме паркым тӱзаташ кӱлмым ончыктеныт. Кокымшо тӱшка районышто экологий да тазалык темым тарватен. Кумшо тӱшка райцентрыште уэш кинотеатрым чоҥаш, тушко модыш автомат-влакым шогалташ, кафем почаш шона.

Пытартышлан самырык-влак ончылно район администраций вуйлатышын заместительже Л. Александрова выступатлен. Вара чолга волонтер ден доброволец-влаклан чап кагазым, волонтер книжкам кучыктеныт. Мероприятийын чыла участникше молодежный форумын участникше сертификатым налын.

Венера АГЛЯМОВА.