Школлан тау мут

Теве мый уэшын Арзамат ялыште улам. Тышке толашлан пеш сай амал лектын – Арзамат ялысе школлан 125 ий темын. Но чаманен каласаш перна: ятыр ий ончыч чапланен шогышо школ, кушто 900 марте йоча тунемын, ынде тӱҥалтыш школ веле улеш. Тыгай статус дене 9 ий ышта. 5-11 класслаште тунемше-влак пошкудо Изи Накаряк ялысе школышко коштыт.

Юмылан тау, тиде школ пеш сай улеш – зданийже кок пачашан, жаплан келшыше, урок-влак посна кабинетлаште эртат, туныктышо-влак коллективат виян.

А Арзамат ялысе школ кугу огыл, но волгыдо да йоҥгыдо. Школ вуйлатыше Елена Александровна Байгулован, коллегыже-влакын да ГКП воспитательница Регина Фаниловна Александрован тыршымыштлан кєра, тыште арулык озалана. Юбилей вашеш нуно стендым,

школын пашаж нерген альбом-влакым ямдыленыт. Ме ўшанена: нуно ончыкыжымат уэмын шогаш тӱҥалыт. Пайремышке илалше-влакат, йоча-влакат ятырын погыненыт. Ончычсо туныктышо ден школ директор-влак чыланат толдымылан веле шӱлыкаҥаш пернен.

Но нунын, очыни, толаш йӧнышт лийын огыл…

Толшо-влак ожсо, волгыдо жапым шарналтеныт. Школ чапланен шогымо жап нерген тудын ончычсо директоржо-влак Н. Я. Юзикаева, В. Ш. Шамиданов да П. А. Алкиев ойленыт. Нунын дене пырля эртыше, сылне жапышке жаплан моло-влакат «пӧртылыныт». Совет пагытыште школ йоча-влакын чотышт дене веле огыл кугешнен. А йоча-влак, чынжымак, шукын лийыныт улмаш, Павел Айкашевичын мутшо почеш, южо ийыште школышто 900 наре йоча тунемын. Школ коллективын пашаже тунемше-влакым туныктымо дене пытен огыл, чыланат пуым, веткормым, шудым ямдыленыт, школ оралтым эрыктеныт да тӱзатеныт, школ пакчаште тыршеныт – школ эре пакчасаска

лектышыж дене кугешнен, тыгак Рефанде совхозын Арзамат ялысе отделенийжылан полшеныт, ял пайремлаште чолган участвоватленыт. Пашам эре келшен да тыршен ыштеныт.

Павел Айкашевич деч вара волгыдо ожсо жапым Арзамат ялысе школын ончычсо туныктышыж ден воспитательже-влак А. Н. Яшмурзина, Р. С. Алкиева, О. А. Яметова, Л. В. Ашиева, Л. В. Шамиданова, М. С. Шамиданова, Д. А. Баймурзина, М. П. Ильина шарналтеныт. Школын ончычсо поварже-влакат толыныт. Тиде – О. А. Накарякова, Е. С. Шамаева, И. Ф. Апканиева. Техничка-влакат, Н. Н. Алексеева ден Р. А. Адельшина, ӧрдыжеш кодын огытыл. Икманаш, школ ятыр еҥлан кокымшо сурт лийын, нуно але мартеат эртыше жапым алал кумылын шарнен илат.

90-ше ийла тӱҥалтыште школышто 147 йоча тунемын, нуным 18 туныктышо ден воспитатель туныктеныт. Мый тыште ятыр оҥай пайремым ужынам: Икымше оҥгырым, пытартыш оҥгырым, Шыже балым, У ийым… Школышто тыгак пайдале тема почеш педсовет-влак, фольклор пайрем-влак эртаралтыныт, артист-влак Т. Краснова ден В. Ильин дене, Марий Эл Республик телевиденийын делегацийже дене вашлиймаш-влак эртеныт. Ялышке чўчкыдын РФ культурын заслуженный пашаеҥже, финн-угор самырык-влак

тӱнямбал организацийлан негызым пыштыше, РФ-се финн-угор журналист-влак ушемын председательже, «Марий Эл» газетын тӱҥ редакторжо Александр Абдулов толын кая. Мый тудлан шкемын 3 книгамым лукташ полшымыжлан чон гыч лекше тау мутым ойлем. Визымше книгамым лукташ тудын Вика ӱдыржӧ полшен.

Но школын юбилейже деке пӧртылына. Пайремым гармонь сем дене Александр Салмияров сӧрастарен. Муро дене кумылым Жанна Салмиярова, Юлия Бикмасова нєлтеныт. Тыгак ятыр оҥай модмаш ден куштымаш-влак лийыныт.

Оҥай пайрем сценарийым ялысе библиотекарь Снежана Муллашева ямдылен. Мероприятийыште шкенжын возымо оҥай почеламутшым Лариса Яндимирова лудын. Вӱдышылан пайремым эртараш Елена Байгулова, Лидия Алкиева, Татьяна Ибаева, Ирина Апканиева, Ольга Накарякова да кугурак класслаште тунемше-влак Даша ден Лариса полшеныт. Ял калык пайремышке чолган

ушнымаш куандарен. Верысе сельский поселений администраций вуйлатыше Станислав Саликов пайремышке Наталья пелашыж дене толын. Пайремыште сельский поселений администраций лӱм дене У ий вашеш шкеныштын территорийыштым лум фигура, курык да гирлянда-влак дене сӧрастарымылан Абдуловмыт, Васильевмыт, Накаряковмыт, Тимуршинмыт еш-влакым да школ коллективым палемдыме.

Пайрем ӱстел нергенат икмыняр поро шомакым каласыде ок лий. Тудо моторын сӧрастарыме да тӱрлӧ сийлан поян лийын. Ӱстелыште уна-влакым тамле когыльо, перемеч, мелна, шке ыштыме колбаса, коя, тӱрлӧ салат-влак да шокшын шӱлештше самбар вученыт. Пайремышке пӧръеҥ-влакат, ӱдырамаш-влакат марий тувырым чиен миеныт, тидлан кӧра пайрем эшеат сылнын чучын. Школын выпускницыже Л. И. Секретарева ожсо марий вургемым ончыктен, Р. П. Валиева пайремышке торасе йӱдвел кундем гычак толын.

Мый, йӧн дене пайдаланен, организатор-влаклан тыгай ямле да сай пайремым эртарымыштлан, а Зинаида ден Максим Ибаевмытлан шокшын вашлиймыштлан чон гыч лекше тау мутым ойлем. Тиде вашлиймаш чонешем кужу жаплан волгыдо шарнымашым коден.

Рита ЯЛАЕВА.