+13 °С
Облачно
Увер
31 Декабря 2020, 21:00
Шкетан театр – эрвел марий-влак дене
2 гыч 8 апрель марте М. Шкетан лӱмеш Марий драме театр эрвел кундемыште илыше марий-влаклан шке спектакльже-влакым ончаш темла
Шкетан театр – эрвел марий-влак дене
Тений 29 ноябрьыште Марий театрлан 100 ий темеш. Тиде гастрольжым тудо лач тиде лӱмгечылан пєлеклен.
2 апрельыште Бирскысе ГДК-ште, 3 апрельыште Монар Культура пєртыштє артист-влак З. Хакимын пьесыж почеш шындыме «Ӱжында?» комедийым модыт. А 3 апрельыште
Мишканыште «Человек из Подольска» спектакль рушла лиеш.
М.Шкетан лӱмеш Марий национальный драме театрын шочмо кечыжлан 1919 ий 29 ноябрьым шотлат. Тиде кечын кызытсе Медведево район Сенькан школышто Иосиф Борисовын (Тыныш Осып) «Закон шумлык» пьесыжым модын ончыктеныт. Театрын эртыме корныштыжо кок йыжыҥым палемдат: любительский да профессиональный.
Икымшыже лу ий шуйнен. 1929 ийыште театрыш Музыкально-драматический искусство марий студийым тунемын пытарыше ӱдыр-рвезе-влак ушненыт. Тыге Марий театрын профессиональный манме йыжыҥже тӱҥалеш да таче кече мартеат шуйна.
Мишкан район гыч Кульчубай ялын эргыже Андрей Андрианов Марий театрын сценыштыже уста артист семын палемдалт кодын. Тудо «Марий Элын калык артистше» кӱкшӧлӱм дене палемдалтын.
Таче театрыште 40 актер пашам ышта. Нунын кокла гыч нылытын «РФ-ын заслуженный артистше» кӱкшӧ лӱм дене палемдалтыныт, 10 еҥ Марий Элын калык да заслуженный артистше лӱман. Кум режиссер спектакль-влакым шында. Репертуарыште 50 наре спектакль уло.
«Человек из Подольска» пьесын сюжетше самырык-влакын тачысе кечышт дене кылдалтын. Тӱҥ герой полиций отделенийыш логалмекше веле йырым-йырже мо ышталтме, шкенжын кузе илымыж нерген мыняр-гынат шонкалаш тӱҥалеш. Тымарте воктене улшо сайжымат, осалжымат ойыраш тыршен огыл. А татар драматург З. Хакимын пьесыж почеш шындыме «Ӱжында?» спектакльыште еш кокласе кыл радамлалтеш. Курортысо роман, кафеште палыме лиймаш южгунамже марий ден вате коклаште умылыдымашым веле огыл луктеш, ойырлымашкат шукта… Икманаш, тиде комедий воштылмо йєре шке илыш нерген шоналташ тарата. Пошкырт кундемысе марий-влак М.Шкетан лӱмеш Марий театрын пашаже-влакым ончаш кумылан лийыт манын ӱшанена.
Светлана БЕЛКОВА, театрын сылнымут пӧлкажым вуйлатыше.
