«Шӧртньӧ» дечат шергакан «той»

«Шӧртньӧ» дечат шергакан «той»

Уфаште эртыше таҥасымаште мемнан спортсменна-влак сеҥышыш лекшаш верч тыршеныт.

23 мартыште 7,5 километрыш куржмаште тренер В. Байметовын воспитанникше Эраст Иманбаевлан шушо лийын огыл. А О. Янгильдин, А. Аликов да Г. Сайранов эн тале 20 спортсмен коклашке логалыныт.

Ӱдыр-влак коклаште мемнан ечызына Анжела Янсубаева 6-шо верым налын. А тудын йолташыже 17 результатым ончыктен. 2005-2006 ийлаште шочшо ӱдыр-влак коклаште кум километран дистанцийыште А. Байрамовын воспитанницыже Светлана Яндубаева икымше верым налын. Мемнан вес ечызына Кристина Семенова финишыш 17-ше толын.

2007-2008 ийлаште шочшо эрге-влак коклаште Максим Сагитов 6-шо результатым ончыктен. Тидыже Максимлан да тудым ямдылыше тренерлан сай результат. Вет тудо шке тӱшкаштыже 42 виян ечызе коклаште таҥасен. Мемнан ечызына-влак Э. Иманбаев ден А. Аликов личный первенствыште 8-ше да 9-ше верлам налыныт.

Таҥасымашын икымше кечыштыже ечызе-влак ечыштым текшыреныт, трасса дене палыме лийыныт, сандене результатшат пеш кӱкшӧ лийын огыл. Кум километран дистанцийыште 2005-2006 ийлаште шочшо рвезе-влак коклаште Константин Исакаев 22-шо ли- йын, а Влас Нямиков - 29.

Лично-командный первенствыште Светлана Янсубаева 13-шо, Кристина Семенова - 18.

Командный протоколышто Мишкан ДЮСШ визымше верым налын. Икмыняр позиций дене мемнан командына призовой вер деч посна кодын. Смешанный эстафетыште эн тале кучедалмаш лийын. Мемнан командын чапшым Алексей Аликов, Ангелина Янсубаева, Эраст Иманбаев, Татьяна Гареева араленыт. Нунын дечын чыланат сеҥымашым гына вученыт. Тыгак лийын. Мемнан спортсменна-влак эстафетыште кумшо лийыныт. Тренер да наставник-влакын мутышт почеш, южгунам «той» медаль «шӧртньӧ» дечат шергырак лиеш. Мемнан командын вуйлатышышт-влак - районысо спорткомитетын председательже Р. Ямаев ден ДЮСШ-н директоржо Н. Зайнитдинов лач тыгак шонат.

Вениамин КОНДОГИН.