Сай результатым ончыктеныт

Сай результатым ончыктеныт

Тений Мишкан районышто 27 май гыч 13 июнь марте чумыр государственный экзаменым (ЕГЭ) 121 тунемше сдатлен, нуно чыланат тений 11 классым пытареныт.

Тунемше-влаклан ЕГЭ иканаште школысо выпускной да ВУЗ-лашке тунемаш пурымо шотышто вступительный экзаменлан шотлалтеш. ЕГЭ-н результатше-влакым палаш манын, ме Мишкан районысо образований отдел начальник Сергей Александров дене мутланышна.

- Сергей Александрович, ондак изишак районышто ЕГЭ-м организоватлыме нерген палдарыза.

- ЕГЭ-м сдатлаш ик пунктым (ППЭ – экзаменым эртарыме пункт) келыштарыме – Мишкан селасе Ф. Буляков лӱмеш 1 №-ан гимназийым. ЕГЭ чылаже 9 аудиторийыште эртен. Тидын годым аудиторийлаште экзамен-влак эртымым чылаже 25 еҥ эскерен, аудиторий деч ӧрдыжтӧ – 15 еҥ да 5 технический специалист. Организационный пашам ГЭК-ыш пурышо кум еҥ - Л. Александрова, С. Александров, Н. Биктубаева да ППЭ вуйлатыше Н. Аспаева эскереныт. КИМ-влакым печатлаш кажне аудиторийыште ноутбук ден принтер-влак вераҥдалтыныт. Экзамен годым ППЭ-ште онлайн режим дене видеоэскерымаш эртаралтын, медицина полыш, орол пункт-влак пашам ыштеныт, экзамен кузе эртымым ГЭК-ын членже, Рособрнадзор пашаеҥ, муниципальный да региональный эскерыше-влак эскереныт. Экзамен-влак экшык деч посна, Государственный итоговый аттестацийым эртарыме радам дене келшышын эртеныт.

- Выпускник-влак тений ЕГЭ-м могай предмет-влак дене сдатленыт?

- 2019 ийыште чумыр государственный экзамен чылаже 11 общеобразовательный предмет дене эртаралтын. Выпускник-влак обязательный кок предметым сдатленыт – руш йылме ден математикым (2019 ийыште математика дене ик кўкшытым гына ойырен налаш йӧн лийын – базовыйым але профильныйым). Моло предметым выпускник-влак шке ойыреныт.

Эн шуко еҥ обществознанийым ойырен налын. Тыгайже 32 еҥ лийын. Кокымшо верыште биологий – 30 еҥ. 28 еҥ химийым сдатлен, 20 еҥ – физикым.

- Экзаменын результатше уже пале?

- Тачысе кечылан тӱҥ периодысо экзаменын результатше пале. Куанаш да кугешнаш амал уло. Районыштына экзаменыште 100 баллым погышо выпускник-влакат улыт. 2 №-ан Мишкан кыдалаш школышто тунемше Тимур Дигитаев физика дене экзаменыште 100 баллым поген, Ирсай ялысе А. Искандаров лӱмеш кыдалаш школышто тунемше Александр Исаметов – химий дене.

Моло выпускникна-влак тыгай предмет-влак дене кӱкшӧ баллым погеныт:

- базовый кӱкшытан математика дене 58 выпускник кокла гыч 31 еҥже «5» оценкым налын;

- профильный кӱкшытан математика дене Артур Дигитаев (2 №-ан Мишкан кыдалаш школ) 99 баллым поген, Тимур Дигитаев (2 №-ан Мишкан кыдалаш школ) – 96 баллым, Алмаз Манаев (1 №-ан лицей) – 92 баллым, Валерий Уразгулов (2 №-ан Мишкан кыдалаш школ) – 92 баллым;

- руш йылме дене 96 баллым Виталий Изибаев (1 №-ан лицей) поген, Алиса Иликбаева (Нерге ялысе школ) – 94 баллым, Валерий Уразгулов (2 №-ан Мишкан кыдалаш школ) ден Алмаз Манаев (1 №-ан лицей) – 91 балл дене;

- химий дене 98 баллым Валерий Уразгулов (2 №-ан Мишкан кыдалаш школ) поген;

- физика дене 96 баллым – Алмаз Манаев (1 №-ан лицей), 94 баллым – Артур Дигитаев (2 №-ан Мишкан кыдалаш школ);

- информатика дене 97 баллым – Тимур Дигитаев (2 №-ан Мишкан кыдалаш школ), 94 баллым – Виталий Изибаев (1 №-ан лицей) ден Данил Зайнитдинов (2 №-ан Мишкан кыдалаш школ).

Тыгай результатыш шумаш – районысо туныктышо-влакын ятыр ияш пашашт, выпускник-влакын тыршен тунеммашышт да ача-ава-влакын тунемаш кумылаҥден моштымышт.

Итоговой государственный аттестацийым сайын эртыше выпускник-влакым алал кумылын саламлена да чоныштлан келшыше ВУЗ-ышко тунемаш пураш тыланена!