Самырык-влакын кечыштым йоча ден илалше-влакат палемденыт

Самырык-влакын кечыштым йоча ден илалше-влакат палемденыт

Ондак Мужыралтме дворец ончылно самырык ача-ава-влак ден самырык мужыр-влакым жаплыме. Тиде кечын кок сӱан лийын: Арзамат ялыште Анастасия ден Иван Булатовмыт мужыраҥыныт, Кӱшыл Шогертеныште – Ульяна ден Станислав Хазиевмыт.

Самырык кече вашеш Мишкан селаште илыше вате-марий Зульфия ден Юрий Николаевмытын Артур эргышт шочын. Тиде нунын кумшо икшывышт. Наталья ден Денис Шапиевмытын пайрем вашеш Ангелина ўдырышт шочын, тудо кокымшо икшывышт улеш.

БР вуйлатышын пашажым жаплан шуктышо Р. Хабиров да Мишкан район МР администраций вуйлатыше П. Трапезников лӱм дене саламлымаш ден пєлек-влакым район администраций вуйлатышын кадр да социальный йодыш-влак шотышто заместительже Л. Александрова ден молодежь дене паша шотышто тӱҥ специалист О. Биктубаева кучыктеныт.

Пайремын кокымшо ужашыже районысо Культура дворец ончылно эртен.

Касын официальный ужашыштыже Лариса Александрова погынышо-влакым чылаштымат Самырык кече дене саламлен да районын мер илышыштыже ойыртемалтше-влаклан БР-се молодежный политика да спорт министерствын Чап грамотыж ден тауштыме серышыжым кучыктен.

Ольга Биктубаеват саламлымашке ушнен да районысо добровольческий пашан вияҥмыже, волонтерский ячейка-влак шукемме нерген ойлен. Выступленийже мучаште тудо «Самырык Гвардийын» чолгаеҥже-влакым Республиканский волонтер рӱдерын да «Самырык Гвардийын» верысе отделенийжын Чап грамотышт ден тауштыме серышышт дене палемден. Изирак пӧлек дене тыгак #Моя МамаСамаяЛучшая интернет-акцийын участникше-влак палемдалтыныт.

Мероприятий кышкарыште талантан йоча-влак слет эртаралтын. Тушто республиканский, межрегиональный олимпиада ден конкурслаште ойыртемалт- ше, ЕГЭ-ште эн шуко баллым погышо выпускник-влак участвоватленыт. Нине ӱдыр-рвезе-влакын ача-аваштым Мишкан район образованийын тауштыме серышышт дене палемдыме.

А йоча ден самырык-влак уло кумылын чия фестивальым вученыт. Чиялташ тӱҥалме командым вучен шуктыдеак, икте-весыштым Холли чия дене чиялташ тӱҥалыныт. Кугыеҥ-влакат тиде оҥайлык деч єрдыжеш кодын огытл – нунын коклаштат тӱрлӧ чия дене чиялталтше-влак койыныт.

Волонтер ден самырык гвардеец-влак «Флаг эстафета» россий триколорлан 350 ий темме лӱмеш акций кышкарыште флешмобым ончыктеныт.

Тудын деч вара площадьыште ямле дискотека тӱҥалын. Калыкым сылне муро-влак дене Уфа гыч толшо «Премьеры» группа дене Зайнетдин куандареныт.

Дискотека жапыштак Шоҥ кас тӱҥалын. Площадь мучко посна пушка дене ош шоҥым шалатыме. Шоҥ поснак йоча-влакым куандарен. Нуно лумла йогышо шоҥ йымалне куанен модыныт.

Пайрем мучашым мотор деч мотор салют сӧрастарен.

Пайрем кастене РДК площадь йыр ятыр торгайыме точка верланен. Тушто йӱдыштӧ волгалтше тӱрлӧ йоча модышым, тамле шашлыкым, «шикаран мамыкым» да моло кочкыш ден арверым ужаленыт. Амалкалче-влак Нефтекамск, Пӱрӧ олала да Бурай села гыч толыныт.

Пайрем шеҥгелан кодын, но тудын нерген волгыдо шарнымаш эше ятыр жап илаш тӱҥалеш.

Венера АГЛЯМОВА.