Регион-влак кокласе олимпиаде эртен

Регион-влак кокласе олимпиаде эртен

Мишкан район гыч сеҥышыш лекше 5 тунемше миен: Апкадирова Снежанна (11 класс, Ардаш школ), Аптыкаева Аделина (9 класс,

Ардаш школ), Губеева Галина (10 класс, Чорай селасе Я. Ялкайн лӱмеш марий гимназий), Николаева Анастасия (10 класс, Тынбай школ), Тимиркаева Анита (9 класс, Чорай селасе Я. Ялкайн лўмеш марий гимназий). Нине ӱдыр-влак шочмо йылмым палымаште келге

шинчымашым ончыктеныт.

Чыланат призер лийын толыныт. Нуным кокымшо вер дене шокшын саламлена, а туныктышыштлан - А. Б. Чаплыгина ден О. В. Иркабаева (Чорай селасе Я. Ялкайн лӱмеш марий гимназий), Н. П. Минаева (Тынбай школ), Н. Д. Байдимирова (Ардаш школ) – тунемше-влакым ямдылымыштлан таум каласена да умбакыжат сай лектышым тыланена.

Тыгай кужу корным эртымеке, кузе Йошкар-Олам ужде толат?! Тудыжо моткоч моторештын. Олимпиаде деч вара йоча-влак дене Марий

Элын рӱдолажым ончен савырнышна. Чорай ялын тале ӱдыржӧ Татьяна Токтарова экскурсовод семын мемнам ола дене палдарыш. «Марий Эл Радио» ГАУК-ыш пурышна. Мемнам Владимир Аптулаев ден Сергей Карпов уло кумылын вашлийыч. Нуно мыланна изирак экскурсийым эртарышт. Радиопередачым да телепередачым эртарыме пєлемлам ончална. Ужна, кузе эфир эрта. Ӱдыр-влак шкат «Покто веле корным ачаленыт» эфирыште участвоватлышт.

Тыгак Марий Эл Республикысе Т. Евсеев лӱмеш тоштерыште лийна. Йоча-влак марий калыкын ожнысо йӱлаж дене, чийыме вургемже дене, пашаште да сурт-кӧргыштӧ кучылтмо арверже дене палыме лийыч. Марий Эл республикыште илыше тӱрлӧ кайыквусо ден ир янлыкым ужыч.

Тыгай лектышан да пайдале мероприятийыш коштмаш район администрацийын, образований отделын полышышт деч посна ок эрте, сандене нунылан регион-влак кокласе олимпиадыш миен толаш йӧным ыштымыштлан таум класена.

Н. БАЙДИМИРОВА.