Пашан лектышыже коеш

Пашан лектышыже коеш

Тиде озанлык эре йол ӱмбалне пеҥгыдын шогымыж дене ойыртемалтын, тыште пеҥгыде оза да шочмо мландым йӧратыше еҥ-влак илат. Рынке илышыш куснымаш ял озанлык пашаеҥ-влакын илышыштышт кугу вашталтышым ыштен. Шуко вашталтыш, нелылык лийын гынат, Ленин лӱмеш колхоз ила, пашам ышта да сай результатыш шуын толеш.

Колхозник-влак ончылно озанлык вуйлатыше Денис Осипов 2018 ийыште шуктымо пашам иктешлен. Колхоз кассышке пурышо чыла окса гыч 76 процентше вольык продукцийым ужалыме деч лийын, 23 процент - шурным ужалыме деч, 1 процент тӱрлӧ услугым ончыктымо деч. Вольык озанлык деч окса 2017 ийысе деч шагалрак пурымын амалжылан лӱштымӧ ушкал-влакын чотышт иземмаш шотлалтеш. Ик кугу проблемылан кадр-влакын ситыдымыштым шотлыман, самырык-влак фермыш пашам ышташ огыт кай.

Колхозлан парышым тӱҥ шотышто вольык озанлык конда. 2018 ийыште вольыкын суткасе кокла нелгытше 380 грамм (2017 ийыште - 332 грамм) лийын. Тыште вольык ончышо-влак А. Минилбаевым, А. Аликовым, Е. Мазиевым, Р. Айгузиным, Г. Александровым, Р. Сайпушевым палемдыме.

2018 ийыште шурным ужалыме деч 4 505 927 теҥге (2017 ийыште - 2 224 114 теҥге) окса пурен.

2019 ийлан тыгай задача шындалтын: у пасу-влакым куралаш, эр шошо гычак такыр пасум куралаш тӱҥалаш, шыжым 380 гектарыште кокияш уржам ӱдаш.

Чумыр ончалмаште, 2018 ий мланде пашаеҥ-влаклан сай лийын. Озанлык жапыштыже пасу пашам шуктен, кӱчык жапыште озымлан химпрополкым ыштен, ончен-куштымо шурным шке вий дене поген налын.

Комбайнер-влак А. Микаев, полышкалышыже Г. Микаев, С. Гильманшин палемдалтыныт. Поро мутым Д. Изергинлан, Ю. Петровлан, С. Яметовлан, Ю. Ямурзинлан, Д. Байназовлан, Г. Аликовлан, Э. Ямурзинлан ойлымо.

Отчетный жапыште 19 961 559 теҥге парышым налме, 584 276 теҥге дотаций пурен.

Денис Александрович пурышо оксам куш кучылтмо нергенат ойлен. Кугу ужашыже пашадарым тӱлаш да ГСМ-ым налаш, электроэнергийлан тӱлаш, техникым налаш кучылталтын.

Колхозник-влакым район администраций вуйлатышын икымше заместительже, ял озанлык отделын начальникше Вил Михайлов саламлен.

Отчетный погынымашыште озанлыкын специалистше-влак выступатленыт, колхозыш пурымо да тушеч лекме нерген йодмаш-влак ончалтыныт, ревизионный комиссий отчетым ыштен. 2019-2021 ий-влаклан коллективный договорым шуктымым, трактор ден автомашина-влакым списатлыме йодышлам каҥашыме.

Ленин лӱмеш колхозын 2018 ийысе пашаже сай могырым ончыкталтын, производствын ончыл еҥже-влакым палемдыме, икмыняр колхозникым пенсийыш ужатыме.

Фирдаус КАДИКОВА.