Паша, культура да спорт пайрем

Паша, культура да спорт пайрем

Районысо калык, уна-влак ты кечын Сабантуй олыкыш шошо ага пашам иктешлаш чумыргеныт. Тиде пайрем деч ончыч районысо чыла служба чот тыршен пашам ыштен.

Национальный вуйргемым чийыше пайрем вӱдышӧ-влак республикын шочмо историйже нерген кӱчыкын каласкаленыт, а тудын ик сылне вержылан Мишкан район шотлалтеш. Районышто пашам йӧратыше калык ила. Тыште пасу пашаеҥ-влак, мӱкшым ончышо-влак, вольыкым ончышо-влак, спортсмен-влак шке мастарлыкыштым да талантыштым тичмашын почын ончыктат. Вет республика ик курымаш историйыштыже моткоч шуко пашам ыштен, а Мишкан район тудын дене ойыраш лийдымын кылдалтын да эртыме корныжат утыж дене огеш ойыртемалт. Район эре республика дене тӧр ошкылын.

Теве пайремын ик эн торжественный жапше - Сабантуйын тистыжым нӧлталыт. Тений тиде суапле пашам шукташ Ленин лӱмеш колхозын председательже, Башкортостан Республикысе ял озанлыкын заслуженный пашаеҥже Д. Осиповлан, куралше-влак коклаште профессиональный мастарлыкым тергыше республиканский олимпиадын сеҥышыже, Мишкан агропромышленный колледжын студентше К. Александровлан, «У илыш» марий калык театрын вуйлатышыже Н. Ахмадеевалан ӱшаныме.

Сценыште «Звезды Белоречья» межрегиональный фестивальын Гран-призшым налше районысо культура пашаеҥ-влакын кугу хоржо. Хор кум йылме дене «Мишкан мыйын муро» районын гимнжым йоҥгалтарен.

Хор деч вара импровизированный сценыште шӱвыр сем почеш вес представлений - Мишкан селан шочмо историйжым тӱҥалыныт.

Икымше имне орваште Орсай шинча, кокымшышто - Митряй, кумышышто - Мишка. Имне-влак почеш ӱдырамаш да йоча-влак тӱрлӧ сурт арверым нумал ошкылыт. Краевед-влакын мутышт почеш, Мишкан села тудлан тӱҥалтышым пыштыше Мишка лӱман еҥ деч шочын.

Калык-влак кокласе келшымашым пеҥгыдемдыше сюита деч вара мутым муниципалитет вуйлатыше П. Трапезниковлан пуымо. Павел Владимирович пайремыш толшо-влакым пайрем дене саламлен да тиде кечым пайдалын эртараш, тўрлє модмаш да аттракционлаште, таҥасымашлаште чолган участвоватлаш тыланен.

Теве пайремын ик эн торжественный татше - ончыл пашаеҥ-влакым саламлымаш тӱҥалын.

Тений вӱдыжгым петырымаште Ленин лӱмеш колхозын трактористше В. Каликаев, С. Васюткин КФХ-н механизаторжо В. Исламгалиев, Э. Владимиров КФХ-н механизаторжо И. Якупов ойыртемалтыныт.

Пасум ӱдаш ямдылымаште «Центральная» МТС-ын Бирский филиалжын механизаторжо Э. Мустафин икымше верыш лектын, кокымшо верым Ленин лӱмеш колхозын тракторист-машинистше Э. Ямурзин налын, кумшо вер С. Ш. Кштаев КФХ-н трактористше А. Петросянлан логалын.

Ӱдымаште икымше верым «Центральная» МТС-ын Бирский филиалжын механизаторжо Ф. Хабертдинов, кокымшо верым Ленин лӱмеш колхозын механизаторжо С. Яметов, кумшо верым «Центральная» МТС-ын Бирский филиалжын механизаторжо И. Ситдиков налыныт.

Сабантуй пайремым молыгунамсе семынак спортивный самолет-влак сєрастареныт.

Ял озанлык техника парад куандарен. Пайрем колонна дене эртыше коллектив-влак шке сылне вургемышт дене єрыктареныт. Эн кугу коллектив медицина, образований, культура, библиотечный система пашаеҥ-влакын лийын. Тыгак энергетик-влак, коммунальщик-влак да моло коллектив-влак колонна дене эртеныт.

Сценылаште да спорт площадкылаште шке мастарлыкышт дене самодеятельный артист да спорт- смен-влак озаланеныт.

Йоча Сабантуй шуко еҥым чумырен. Тыштат шкеныштын геройышт да сеҥышышт-влак шукын лийыныт.

Тений «Мишкан районын почетный гражданинже» чап лӱмым Ленин лӱмеш колхозын председательже Осипов Денис Александровичлан пуымо. «Мишкан селан почетный гражданинже» лӱмым Шамсутдинова Альфия Ангамовна сулен налын.

Унагудо-влак шкешт деке пагален ӱжыныт.

«Эн сай унагудо» конкурсышто тений районысо кажне сельский поселений участвоватлен, тиддеч посна «Мишкан» ПЖКХ, агроколледж шке унагудыштым почыныт. Кажныже мо дене гынат ойыртемалташ тыршен. Иктышт поян ӱстел чесышт дене комиссий член-влакым шке векышт савыраш тыршеныт гын, весышт тошто арвер-влакым чумыреныт, кумышышт ял озанлык продукций выставкым ямдылен…

Кажныжым посна аклен ончалаш гын, Мишкан сельсовет СП-н унагудыжлан шушо лийын огыл. Тыште поян ӱстел чес деч посна У. Небогатикован «Взгляд» фотошколышто тунемшыже-влакын фотовыставкышт, шке ыштыме пеледыш да светильник-влак, Рим ден Дим Галимовмытын пашашт, пӱя кол дене да молат лийыныт. Сандене жюри член-влак тиде унагудылан икымше верым пуэныт.

Урьяде сельский поселений ял озанлык выставкыж дене ойыртемалтын. Тыште каза шӧр гыч ямдылыме кумысым, тувыртышым, ӱмбалым налаш лийын. Йоча-влак каза-влакым, презе-влакым йӧратен онченыт. Унагудо кєргым тошто, арвер-влак дене сӧрастарыме. Нунылан кокымшо верым пуымо.

Кумшо вер Мавлют сельсоветлан логалын. Тыштат шке ойыртемже лийын. Унагудым ялысе пєрт семын келыштарыме.

Моло конкурсант-влакат почеш кодын огытыл. Чыла вере поян чесан ӱстел лийын. Кажне унагудо ончылно уна-влакым кинде-шинчал, пайрем муро дене вашлийыныт. Сельский поселенийын илышым ончыктышо фотовыставка-влак лийыныт.

В. КОНДОГИН.

В. АГЛЯМОВА.