Пӱрӧвӱдыштӧ йӱштылыныт

Вӱд модмо кечым палемденыт

Мишкан районысо калык 18 гыч 19 январь йӱдым идалык еда Пӱрӧ эҥерыште йӱштылеш. Тынеш пурышо-влаклан Пӱрӧвӱд сер

Иордан эҥерым символизироватла, чимарий-влаклан – уло чонанлан вий ден эмым пуэн шогышо илыш вӱдым.

Вет Вӱд модмо кечым марий-влак христиан йӱла деч ятыр курым ожно палемденыт. Такшым Христос кунам тынеш пурымым

нигӧ раш каласен ок керт. Эсогыл, кунам шочмыжат раш огыл – тудым Кече Оным жаплыме кечын палемдаш тӱҥалыныт. Христиан-влакын моло пайремыштат языческий пайрем-влак дене тӧр толеш, икманаш, нуно шке йӱлаштым языческий йӱла дене

чак кылденыт.

Тиде кечын Пӱрӧ эҥерыш йӱштылаш руш-влакат, татар ден марий-влакат миеныт. Икманаш, юзо эҥер пӱтынь районым чумырен. Вет районышто илыше-влак тӱрлӧ йӱлам кучат гынат, чыла пайремымат пырля эртарат.

Православный йӱлам кучышо руш-влакын ойышт почеш, Пӱрӧвӱд Иордан эҥер семынак, юзо виян улеш. Марий-влак тудым эре да яндар улмыжлан жаплат. Тидлан кӧра идалык еда йӱштылмашке ятыр еҥ погына. Нунын коклаште изи йоча-влакат, илалше-влакат лийыт. Палыме-влакат шукын койыт. Чылаштынат чурийышт йошкарген, эҥер сер мучко алал кумыл озалана.

Тиде кечын вӱдыш пурышо-влак ӱшанат – юзо вӱд нунын чыла уда шонышышт ден черыштым, сулыкышт ден ойгыштым мушкеш.

Иктаж экшык ынже лий манын, эҥер воктене МЧС пашаеҥ-влак дежуритленыт. Нуно чыла еҥланат полшаш ямде лийыныт. Сер

воктенак шокшо автобус шоген, тушто йӱштылшӧ-влакым шокшо самовар вучен. Туштак кукшо вургемым чияш йӧн лийын.

Вӱд модмо кече, конешне, утларакшым телын эн йӱштӧ жапшылан логалеш. Но тений тиде кечын леве кече шоген. А йӱштылшӧ-влак тидлан изишат тургыжланен огытыл, мӧҥгешла, куаненыт веле.

Икманаш, пайрем сайын эртен да ятыр еҥлан алал кумылым пӧлеклен.

Вениамин КОНДОГИН.