Пӱнчер школ йоча-влаклан омсажым почын.

Йоча-влаклан омсажым почын

Смена мучко йоча-влак тӱрлӧ мероприятийлаште участвоватленыт. Кажне вес кечыже ончычсо деч мо дене гынат ойыртемалтын, тӱрлӧ событийлан поян лийын. Лагерьыште йоча-влак у йолташ дене палыме лийыныт, у талантыштым пален налыныт, пашам ыштымын пайдажым умыленыт…

Мыланна лагерьыш толшо йоча-влакым мо дене гынат ӧрыктарыме шуын. Лагерьым почмо годым Ириска клоун озаланен. Тудым ончен, йоча-влак шер теммешке воштылыныт. Смена жапыште культурылан да таза илыш-йӱлалан гына огыл кугу верым ойырымо, тыгак корнышто коштмо правилым тунемаш, пожарный безопасностьлан, наркоманий ваштареш кучедалашлан шагал огыл верым ойырымо. Йоча-влаклан психологический полышым пуымо шотышто беседа-влак, тӱрлӧ модмаш-влак эртаралтыныт.

Тазалыкым спорт деч посна шуараш ок лий. Мемнан рвезына-влак спортивно-развлекательный мероприятийлаште чолган участвоватленыт. Нунылан «Путешествие в далекие страны», «Зов джунглей» да моло мероприятий-влак эртаралтыныт. Пӱртӱс лоҥгашке экскурсий дене лектын коштмаш йоча-влакын шарнымашешышт кужу жаплан кодын.

Йоча-влак спортышто гына огыл, творчествыштат мастарлыкыштым ончыктеныт. Кумылын муреныт, куштеныт, сӱретленыт.

Школ пеленсе лагерьын пашажым чыла структура ден подразделенийын ик ой дене ыштымышт деч посна ворандараш огеш лий. Сандене ме культура, библиотека пашаеҥ-влаклан, туныктышо, техперсонал да повар-влаклан кугу таум каласена.

Школ пеленсе лагерьыште эртарыме кече-влак кажне йоча чонешыже пале кышам коден манын ӱшанена.

Л. ЗАЙНИЕВА.