+20 °С
Дождь
Увер
31 Декабря 2020, 21:00
Ош халат, курымашлык салтак...
27 мартыште «Тольяттинский медколледж» ГБПОУ-што «Иман вондер гоч шӱдыр деке» профессиональный усталык конкурс эртен.
Ош халат, курымашлык салтак...
Тушто Приволжский федеральный округысо медицинский да фармацевтический профессиональный образовательный организацийлаште «сестринское дело» специальность почеш выпускной курслаште тунемше-влак вийыштым тергеныт. Конкурсышто Приволжский да Южный федеральный округласе медицинский да фармацевтический 8 тунемме заведений гыч
11 студент усталыкшым текшыраш кумылан лийын. Башкортостан Республикын чапшым «Бирский медико-фармацевтический колледж» ГАПОУ-што «сестринское дело» специальность почеш 411 м/с группын выпускницыже, Арзамат ялыште шочын-кушшо Виолетта Тимуршина арален.
Йоча жапыштыже ятыр еҥ туныктышо, врач, актер лияш шона. Виолетта медсестра лияш шонен пыштен да шке шонымашыжым шуктен.
«Молан тый лач тиде профессийым ойырен налынат?», - йодышлан Виолетта тыге вашештен: «Ондак еҥ-влаклан полшынем,
кокымшо – тиде илышыште моткоч кўлешан профессий. Мый кеч-кунамат лишыл еҥем, ончыкыжым икшывем, уныкам-влаклан,
шоҥгеммекышт, ачам ден авамлан икымше полышым ончыктен кертам».
Ӱдырын класс вуйлатышыже Ю. Зорнаян мутшо почеш, Виолетта алал кумылан, еҥ ойгым шижын моштышо, поро чонан, йытыра койышан айдеме улеш.
2016-2017 ийлаште тунеммаште да научно-шымлымаш пашаште кугу сеҥымашыш шумыжлан Виолетта Тимуршина Башкортостан Республикысе здравоохранений министрын стипендийже дене палемдалтын. Но Виолетта тиде сеҥымаш дене серлагаш ок шоно – тудо врач лийнеже, а профессийым налмеке, районысо калыклан полшаш манын, шочмо кундемышкыже пӧртылнеже.
Е. КОЛОНСКИХ, «Бирский медико-фармацевтический колледж» пашаеҥ.
