Ок мондалт тулан Афганистан

Ок мондалт тулан Афганистан

Мероприятийын икымше ужашыже сарын участникше, школын выпускникше-влак дене вашлиймашлан пєлеклалтын. Кокымшо

ужашыште шашке дене модаш йӧратыше-влак коклаште турнир эртен.

Школым тунем пытарыше кандаш выпускниклан афган сарым шке шинча дене ужаш пернен. Нунын лӱмыштым да фотографийыштым школнан ик стендыштыже вераҥдыме. Тиде В. А. Абдулин (Санкт-Петербургышто ила), Г. В. Янчиев (Уфа), Р. И. Киликаев (Нефтекамск), А. Д. Ипаков (Йошкар-Ола), Д. И. Илинбаев (Измар ял), В. В. Дмитриев (Тынбай ял), В. А Шайбаков (Уфа), В. П. Ирдигитов (чаманен каласыман, илыш гыч пеш эр каен). Нунын дене школна кугешна да самырык тукымым ончен-куштымаште примерлан шында.

Вашлиймашке Данил Илаевич Илинбаев ден Вадим Владимирович Дмитриев толыныт. Уна семын педагогический пашан ветеранже, ятыр ийышкен военное дело, варажым ОБЖ, историй да обществознаний предметлам туныктышо Филимон Шайбакович Ибатовым ӱжмӧ.

Н. П. Минаеван вӱдымыж почеш икте почеш весылан мут пуалтын. Кажнын выступленийже тунемше-влакын ушешышт могай-гынат

поро кышам коден манын, ӱшаныме шуэш. Вет афганистан сӧйым ужшо-влакын оҥыштышт ятыр медаль чолгыжын. Ф. Ш. Ибатов

сарым ужшо тунемшыже-влак нерген кугешнен каласкалыш, Можо оҥай, нылытын (Д. Илинбаев, В. Шайбаков, В. Дмитриев, В. Ирдигитов) ик классыште тунемыныт улмаш. Нуно ик жапыште, ик верыште душман-влак ваштареш кредалыныт. Тиде сарыште Башкирий гыч 300 утла самырык еҥын илышыже кӱрылтын. Нунын коклаште иктыже - Данил Илаевичын Анатолий Илаевич изаже. Тудым чыланат ик минут шып шоген шарналтеныт. Школышто туныктышо М. А. Шамратов тиде сарым тӱрлӧ семын лавырташ тыршыме, кызытсе журналист-влакын тӱрлӧ семын возымышт нерген чон корштен ойлен. Тылеч вара чыланат афган сарлан пєлеклалтше мурым колыштыныт, видиопрезентацийым онченыт.

Муро ден презентаций деч вара кажне еҥын шўм-чоныштыжо совет салтак-влак деке кугешныме кумыл шочын. Вашлиймаш деч вара кумылан-влак шашке дене модыныт. Турнирым школын тренер-преподавательже В. А. Шамратов ямдылен да эртарен. Куд доскаште иканаште 12 тунемше модын. Тӱҥалтыш класслаште тунемше-влак коклаште С. Ишмурзинлан (1 класс) шушо лийын огыл. Тудлан Д. И. Илинбаев шке кондымо пєлекшым кучыктен. 2 ден 3-шо верлам Н. Яниева (3 кл.) ден Д. Мендияров (3 кл.) пӧленыт. 5-7 класслаште тунемше-влак коклаште С. Ялитова (5 кл.) ден В. Салаева (7 кл.) 1 да 2-шо верлам пӧленыт. Кумшо верым К. Ибашева (5 кл.) налын. 8-11 класслаште В. Янубаев (11 кл.) икымше лийын, 2-шо верым Д. Аптыков (8 кл.) налын, кумшым - В. Алексеев (10 кл.).

Н. МИНАЕВА.