Объективыште - республика

Объективыште - республика

«Шке йӱк» республиканский йоча-юношеский творческий конкурсышто 256 участник регистрироватлалтын, нуно чылаже 600 пашам колтеныт. Конкурсын икмыняр номинацийжым икымше гана Башкортостан - Военно-спортивный фонд курироватлен.

Конкурсышто поснак Буздяк, Краснокам, Иглин, Илиш, Мишкан, Бижбуляк, Шаран районла гыч Нефтекамск, Октябрьский, Кумертау, Салават олаласе молодежный политика учреждений-влакын воспитанникышт чолга лийыныт. Конкурсын итогшо почеш 6 еҥ «Артек» тӱнямбал йоча лагерьыш майыште медиа-отряд дене кая. Тиддеч посна, «Лига юных журналистов» ООДО-н Башкортостанысе отделенийышкыже пурышо ушем-влакын темлымышт почеш, эше 17 самырык фотограф, smm-репортер да тележурналист-влак тиде медиа-отрядын пашаштыже участвоватлаш тӱҥалыт. Майыште Башкортостан гыч чылаже 33 тунемше «Артек» лагерьышке кая, нунын коклаште «Путник» рӱдерын «Взгляд» фотошколжо гыч ик тунемше уло.

Торжественный обстановкышто Башкортостан - Военно-спортивный фондын исполнительный директоржо В. Макин БР молодежный политика да спорт министр Р. Хабибовын саламлыме серышыжым лудын.

Республикысе самырык журналист-влак лигын председательже И. Карелин конкурсышто сеҥыше-влакым саламлен, нунын уста туныктышышт-влаклан тауштыме серышым кучыктен. Нунын коклаште «Взгляд» фотошколын вуйлатышыже У. Небогатикова лийын.

«Взгляд» йоча фотошколын куд тунемшыжын конкурсышто шумо результатышт: БР молодежный политика да спорт министерствын дипломжо (II вер) - С. Альфия; Башкортостан - Военно-спортивный фондын дипломжо - Н. Анна; «Лига юных журналистов» ООДО Башкортостанский отделенийын дипломжо - А. Анастасия, Г. Элина, С. Анастасия, Я. Карина.

Шукерте огыл Башкортостан Республикын национальный музейыштыже «Мой край, возлюбленный навеки» фотовыставка почылтын. Тудо республикылан 100 ий темме вашеш эртарыме фотоконкурс негызеш ышталтын. Тиде конкурсышто мемнан тунемшына Я. Карина кокымшо верым налын да пашаже выставкыш логалын.

В. АГЛЯМОВА («Путник» рӱдерын материалже негызеш ямдылыме).