«Мый йӧратем тыйым, илыш!»

«Мый йӧратем тыйым, илыш!»

Тиде кечын районысо Культура дворецын фойештыже еҥ-влак пеш шукын погыненыт, мемнан-влак деч посна тыште Аскын, Караидель, Бирский, Бурай, Благовещенск, Кушнаренко, Нуриман районла гыч художественный самодеятельностьын участникше-влак лийыныт.

Уна-влакым моткоч сайын вашлийыныт: толшо-влаклан вигак «Три апельсина» кафеште шокшо чайым темленыт, тыгак частный предприниматель-влак шашлыкым, пельменьым, мантым да моло кочкыш-йӧрварым ямдыленыт.

Мемнан район дене палыме лияш шонышо-влаклан рӱдӧ библиотечный системын пашаеҥже ден районысо ветеран-влак совет «Время творить» выставкым ямдыленыт. Тыште илалше еҥ-влакын пашашт ончыкталтын.

Выставкын чыла участникшылан мероприятий мучаште районысо ветеран-влак совет Тауштыме серышым да шарнымаш пӧлекым

кучыктен.

Мероприятий тӱҥалме деч ончыч фестивальын участникше-влакым район администраций вуйлатышын кадр да социальный йодыш-влак шотышто заместительже Л. Александрова ден жюри председатель Н. Кадырова саламленыт.

- Фестивальын лӱмжак ончыкта, тушто сулен налме канышыште улшо еҥ-влак участвоватлат, - каласен шке выступленийыштыже

Лариса Геннадиевна да участник-влаклан сеҥымашым тыланен. Участник-влакын мастарлыкыштым компетентный жюри аклен. Тудын составыштыже лийыныт: Россий Федерацийын заслуженный артистше, Башкортостан Республикын калык артистше, Татарстан Республикын заслуженный артистше Назифа Кадырова, Российын заслуженный артистше, БР-се калык инструмент-влак оркестрым

ыштыше Рамиль Гайзуллин, Башкортостан Республикын калык артистше, Ф. Гаскаров лӱмеш государственный академический

ансамбльын балетмейстерже Риф Габитов, БР культурын заслуженный пашаеҥже, «Мый йӧратем тыйым, илыш» республиканский

фестивальын гала-концертшын режиссержо Лидия Иванова, Еш, паша да калыкым социально аралыше министерствын благотворительностьым вияҥдыше, мероприятийым виктарыше отделын вӱдышӧ специалист-экспертше Эвелина Горбенко лийыныт.

Мероприятийым оза-влак - Мишкан районын артистше-влак почыныт. Шке мастарлыкыштым «Ручейки» (Изи Накаряк СДК), «Мишкан сем» (Мишкан), «Акарт» (Ардаш СДК), «Ӱжара» (Нерге клуб), Пӱнчер клубын инструментальный ансамбльже ончыктеныт. Сольный номер дене А. Фатхинуров (Карач) ден Л. Иванов (Мишкан) выступатленыт.

Залыште шинчыше-влакым Аскын район гыч 83 ияш кувава З. Шарифьянова куанен-ӧрыктарен. Тудо шке возымо «Я люблю тебя, жизнь!» почеламутшым моткоч сайын лудын пуэн. Почеламутым лудмаште тыгак А. Каримова (Бирск), Н. Анохина (Караидель), М. Муллагильдина (Кушнаренко) ойыртемалтыныт.

Мурызо-влак А. Аскарова, Н. Гильмутдинова (Аскын), Е. Субботна (Бирск), Ф. Шарифьянова, З. Шарафиева (Бурай), Г. Сабирова (Нуриман), трио «Рябинушка» (Благовещенск) да молат сылне мурышт дене куандареныт. Куштымаш-влакат оҥай лийыныт.

Фестивальын результатше чыла зональный этап эртымеке рашемеш. Сеҥыше-влак Илалше-влакын тӱнямбал кечышт вашеш гала-концертыште участвоватлаш тӱҥалыт.

Венера АГЛЯМОВА.