Мишкан турист-влакын триумфышт

Мишкан турист-влакын триумфышт

Фестивальыште республикысе 18 район да ола гыч 318 самырык турист вийжым терген. Таҥасымаш А, Б да С группылаште 3 да 3 классан

дистанцийлаште эртен.

Мемнан районын чапшым «Путник» рӱдерыште тунемше-влак араленыт. Нуно А да Б дистанцийлаште кокымшо да кумшо группылаште вийыштым тергеныт.

Командына-влакым рӱдерыште туныктышо-влак Д. Алиева, Е. Биктышева да А. Ибаев вуйлатеныт. Фестивальын программыже поян да оҥай лийын. Самырык турист-влак шкеныштын усталыкыштым йолешке дистанцийлаште да ориентированийыште веле огыл ончыктеныт, тыгак велосипед

дене таҥасеныт, тӱрлӧ конкурслаште участвоватленыт («Видеоролик», краевед-влак конкурс), мурым муреныт, «Визиткым» ончыктеныт...

Таҥасымашын кажне ужашыште шукырак баллым погаш кӱлын. Ме эн шуко баллым «йолешке-кылдыш», «йолешке-шкетын» да конкурсный программыште погенна. Моло конкурслаштат туристна-влак сай могырчын ойыртемалтыныт.

Конкурсный программынам рўдерын методистше У. Небогатикова ямдылен. Тиде программа Мишкан мландыште чынжымак талантан самырык-влак шуко улмым рашемден. Ӱдыр-рвезына-влак ончышо-влакын веле огыл, жюринат кумылжым савырен кертыныт да кӱкшӧ баллым налыныт.

«Йолешке» дистанцийыште рвезе-влак кокла гыч Ильмар Батыров ойыртемалтын, ӱдыр-влак кокла гыч – Надежда Айгузина. Чумыр командный зачетыштокок командынат икымше верым налын. Районын историйыштыже эше тыгай сеҥымаш лийын огыл. Фестивальыште сеҥымаш – ондак тунемше-влакын надырышт. Нуно идалык мучко тыршен ямдылалтыныт, жапышт ден вийыштым чаманен огытыл, тӱрлӧ таҥасымашлаште ойыртемалтыныт. Но туныктышо-влакынат надырышт кугу.

Тиде сеҥымаш верч пӱтынь «Путник» рӱдер тыршен. Башкортостан Республиклан 100 ий темме вашеш спортсменна-влак сеҥымашыштым шочмо районлан пӧлеклат.

Чолга да чулым туристна-влакым да нунын туныктышыштым тиде сеҥымаш дене саламлена да ончыкыжым эшеат кугурак сеҥымашыш шуаш тыланена!

Фирдаус КАДИКОВА (материалым «Путник» рӱдер пуэн).