Кувавай-влак, ме тендам пагалена!

Кувавай-влак, ме тендам пагалена!

Февраль мучаште райрӱдыштӧ илыше Анна Кибаева ден Казиза Мусагитдинова РФ Президент В. Путин деч саламлымашым налыныт

90 ий темме лӱмеш саламлымашан серышыште тыге возалтын: «Кугу Отечественный сар жапысе неле ийлам те чап дене сеҥен

лектында, элнан поянлыкшым да куатшым таптенда. Шочмо элым йӧратымыда ий гыч ийыш кугем гына толын. Тендан тукымын - сеҥыше тукымын - подвигше курым дене илаш да кумда элыштына илыше калык-влак коклаште келшымашым вияҥдаш тӱҥалеш».

Президентын саламлымашыжым да шарнымаш пӧлекым юбиляр-влаклан районысо ветеран-влак советын председательже Ю. Балахнина ден Мишкан сельсовет СП администраций вуйлатышын заместительже Р. Набиев кучыктеныт.

90 ийым эртыше кужу ӱмыран кувай-влакын вӱдыжгышӧ шинчашт мыланна шуко нерген шижтарат. Вет ынде нунылан лишыл еҥ-влакын пагалымашышт да йӧратымашышт, моло-влакын аклымышт деч шергыже нимо уке…

«Чылан ик семын иленна…»

Анна Шамидановна Кибаева 1929 ийыште Уялыште шочын. Тудын изи улмыж годымак ачаже колен, ача почешак ик тылзаш шӱжаржат ош тӱням коден каен.

Тудо аваж дене гына кодын. Аваже «Интернационал» колхозышто пашам ыштен. Изишак кугеммеке Аннат колхозышто шала пашаш

кошташ тӱҥалын. Ту жаплан тудо моткоч грамотный ӱдырлан шотлалтын, вет ныл классым тунем пытарыше лийын. Чаманаш веле

кодеш, умбакыже шинчымашым налаш йӧнжӧ лийын огыл.

21 ияш улмыж годым Кугу Соказа рвезылан, Кугу Отечественный сарын участникшылан (япон интервент-влак ваштареш кредалын) марлан лектын. Уялыште иленыт, Тамара ӱдырышт да Валерий эргышт шочыныт. Ӱмыр мучко шке сурт дене иленыт, вольыкым онченыт, пакчам шынденыт, тыгодымак колхозышто пашам ыштеныт. Анна тӱрлӧ вере пашам ыштен - колхозышто шала пашазе, промкомбинатыште грузчик, райпошто орол.

Райпо гыч пенсийыш каен. 1995 ийыште пелашыже колен. Икмыняр ий ончыч тудлан, сар участникын тулыкеш кодшо ватыжлан, илыме верым налаш сертификатым пуэныт. Пачерым Мишканыште налыныт. Кызыт тушто ӱдыржӧ да уныкаже-влак дене пырля ила.

Ийготшо кугу гынат, Анна Шамидановна очким огеш чие, йӧратыме марла газетшым лудеш, пенсий кондымо кагазеш кидпалыжым шке пышта, тошто фильм-влакым куанен онча.

Кужу ӱмырын секретше могай манын йодмылан тыгай вашмут шоктыш:

- Моло-влак деч ойыртемалтде, чылан ик семын иленна, тыглай кочкышым кочкынна, таза илыш-йӱлам кученна, аракам йӱын огынал, тамакам шупшын огынал.

Поян тукым гыч Казиза Сайпаталовна Мусагитдинова Кульчубай ялыште 1929 ийыште шочын. Ешыште ик икшыве гына лийын, еш улан,

поян илен.

- Имньын, моло тӱкан кугу вольыкын чотшат лийын огыл, - манеш тудо эртыше ийлам шарналтышыла. - Мемнан шкенан памашна, вольыкым кўтылаш олыкна лийын. Варажым чыла поянлыкна колхозыш куснен.

Сарышке еш озам ийгот кугулан кӧра налын огытыл, а паша армийыш колтеныт, тушечын тудо пӧртылын огыл.

Казиза аваж дене илен, аваже «Первомайский» колхозышто пашам ыштен. 12 ияш ӱдырланат паша ситен. Кеҥежым шудым

ямдыленыт, колхоз пасушто ыштеныт, шыжым лектышым погаш полшеныт.

Тудо сарын участникше Антон Мусагитдиновлан марлан лектын. Кум икшывым ончен куштеныт. Кызыт тудо эн изи ӱдыржӧ дене ила. Казиза таче пеш поян кувава улеш, икшывыж-влак деч посна тудым 7 уныка да 10 кугезе уныка куандарат.

Венера АГЛЯМОВА.