Куштымаш дене шулдыраҥын

Куштымаш дене шулдыраҥын

Культура пашаеҥ-влакын кечыштышт Уфасе З. Исмагилова лӱмеш государственный искусство институтын Ф. Шаляпин залыштыже тиде сферыште пашам ыштыше-влаклан государственный наградым пуымо. Наградым Башкортостан Республик вуйлатышын пашажым шуктышо Радий Хабиров кучыктен.

Тиде пайрем кечын республикысе культура сферыште пашам ыштыше 30 еҥ орден, чап лӱм да чап кагаз-влак дене палемдалтын. Башкортостан Республикын Почетный грамотыжым налше лу еҥ кокла гыч иктыже «Эрвел» куштышо калык ансамбльын балетмейстерже Ирина Имаева лийын. Ме Ирина Елисеевна деч республика вуйлатыше дене вашлиймаш могай шарнымашым кодымо нерген палдараш йодна.

- Вашлиймаш пеш мотор залыште эртен. Мероприятийым молодежный симфонический оркестр почын, тидыже пайрем шўлышым эшеат чот ешарен. Радий Фаритовичын культура пашаеҥ-влакын пашаштлан акым пуымыжо пеш келшен: «Чон почын каласем, - манын тудо, - мемнан кугу республикына гыч культурын чыла шӧрынжым ончыктышо эн уста еҥ-влакын погынымашыштышт икымше гана улам. Эн ончычак чыландамат Культура пашаеҥ-влакын кечышт дене шокшын саламлем. Мемнан республикыште 15 тўжем утла еҥ шке илышыжым культура дене кылден. Мемнан илышнам те сылнырак ыштеда, тидлан пеш кугу таум каласем. Мый культурым, музыкым, изобразительный искусствым нӧлтышӧ тукымым куштышо-влак ончылан вуемым савем. Самырык артист-влакым, культура пашаеҥ-влакым, - куштымыланда тау! Тукым гыч тукымыш тыгай кылна пеҥгыдем гына толеш, у деч у талант-влак кушкын шогат…»

- Ирина Елисеевна, районышто да вес кундемлаштат тендан ты сферыште пашам тыршен ыштымыда нерген сайын палат. Ансамбль дене пырля шумо сеҥымашдам ме сцена гыч сайын ужына. Кажне куштымашым шындыме годым моткоч чот тыршаш логалеш вет…

- Конешне, ончышо-влаклан мотор куштымашым лукмешке ме пеш кужун репетироватлена. Тидлан физический ямдылалтмаш, чон кумыл да усталык кӱлыт. Сандене мый ансамбльын участникше-влаклан умылымыштлан, чытымыштлан да куштымаш искусствылан ӱшанле улмыштлан кугу таум каласем. Ӱшаныза, куштымаш дене шулдыраҥше участник-влак талантан гына огыл, а пеш чот пашам йӧратышан улыт.

- Тендан репертуарыштыда у куштымаш-влак шочыныт?

- Ансамбльын юбилейже вашеш Славик Асмаевын шындыме кум у куштымашыжым ямдыленна. Ончышо-влак нуным пеш шокшын вашлийыныт. Тугеже тыршымына арам лийын огыл.

Ансамбль чӱчкыдынак тӱрлӧ кӱкшытан концертлаште мастарлыкшым ончыкта. Мутлан, ноябрьыште «Соцветие дружбы» концертыште участвоватленна. Тушко чумыр республика гыч эн талантан коллектив-влак гына чумыргеныт. Сандене ме «маркым кучышаш» улына. Мемнан чапланыше коллективнан корныжым умбакыже шуйыман. Кызыт 2020 ийыште эртышаш фольклориадылан ямдылалташ тӱҥалынна.

Мемнан пашанам умылышо, аклыше да эре полшен шогышо муниципалитет вуйлатыше Р. Мусинлан, РДК директор А. Хановлан, конешне, мишкан калыклан кугу тау.

- Ирина Елисеевна, ме тендам тыгай кӱкшӧ наградым налмыда дене шокшын саламлена да ончыкыжым у творческий сеҥымашым тыланен кодына.

Фирдаус КАДИКОВА.