Кум ий Военно-морской флотышто

Кум ий Военно-морской флотышто

Тиде кече районыштына пеш торжественно эртен. Вет район гычын тӱрлӧ теҥыз ден океанлаште 300 наре рвезе служитлен.

Военно-морской флотын кечыже лӱмеш пайремышке нунын кокла гыч пелыже утла еҥ толын. Нунын дене пырля пайремыштым пелашышт, икшывышт, уныкашт, кугезе уныкашт, родо-шочшышт да йолташышт палемденыт. Пайремыш Пӱрӧ район гычат уна-влак толыныт. Нуно пайремым эртараш веле огыл, ямдылашат полшеныт.

Мероприятий Сеҥымаш мемориал воктеке пеледыш аршашым пыштымаш гыч тӱҥалын. Тылеч вара автопробег эртаралтын. Тушко 40 утла машина ушнен. Нине машина-влак Мишкан уремла дене эркын коштын савырненыт да каныш парк воктене чарненыт. Тыште уже пайрем сем йоҥгалтын да еҥ-влак торжественный мероприятийлан ямдылалтыныт. Тудет Россий Федарцийын да Башкортостан Республикын гимнышт гыч тӱҥалын. Гимн-влак деч вара строй дене моряк-влак лектыныт. Моряк-влак радамыште илалше-влакат, армий гыч шукерте огыл пӧртылшӧ рвезе-влакат лийыныт. Эн шоҥгыжлан – С. Саляевлан 1 январьыште 90 ий темеш. Ийготшо шагал огыл гынат, шкенжым тудо рыҥ кучен. Икманаш, морякым теҥыз сайын шуарен.

Моряк-влакым пайремышт дене Мишкан район МР администраций вуйлатыше П. Трапезников, Мишкан да Бурай район-влакын военный комиссарже С. Васильев, Пӱрӧ ола да Пӱрӧ районын военный комиссарже А. Асмаев, Мишкан сельсовет сельский поселенийысе тӱҥалтыш ветеран организацийын председательже Х. Гайфуллин да моло саламленыт. Районысо самырык-влак лӱм дене салам шомакым район администрацийын физический культура, спорт, туризм да молодежный политика шотышто специалистше О. Биктубаева ойлен. Мер пашаште ойыртемалтше моряк-влакым район администрацийын да молодежь отделын тауштыме серышышт дене палемдыме. А район администраций вуйлатыше нунылан шарнымаш медаль-влакым кучыктен.

Погынышо-влак коклаште мый ятыр палымем ужынам. Иктыже Роберт Карамович Караров ыле. Р. Караров сельхозхимийым вуйлатен, ме тудын нерген газетыштына уже возенна. Корабельный старшина лийын служитлыше палымем дене ме ик жап мутланен шогышна.

- А те могай ийлаште служитлышда? – йодым мый Роберт Карамович деч.

- Ода ӱшане, тиде ятыр ожно ыле. Армийышке мый 1962 ийыште каенам. Район гыч ик кечыште нылытын кайышна: Янагуш ял гыч М. Бикбулатов (подводник лийын служитлен), Ф. Саитханов (минер-торпедист), Башбайбак гыч Р. Хамзин (вспомогательный корабльын старшинаже) да мый. Ме чыланат Военно-Морской флотыш логалынна. Ныл ий служитленна. 9 тылзе Руш отрошто (кызыт тушто Дальневосточный университет пашам ышта) учебный отрядыште тунемна. Мемнам водолаз пашалан (ЭДА-57 искусственно шўлымаш аппарат дене 35 метр наре келгытыш 25 гана волен), шлюпка дене кошташ, корабльын илышыже верч кучедалаш туныктеныт. Служба годым чылажат кўлеш лийын.

1963 ий июльышто мемнам тӱрлӧ корабльышке колтышт. Мый «Бурливый» эскадренный миноносецыш логальым. Служба жапыште Кечывалвел-Китайский теҥызыште коштынна, тушто американ ден япон-влакын ученийыштым – маневрыштым, йӱдым самолет-влак чоҥештылмым эскеренна. Тыгак Индонезийыш, Вьетнамыш миенна.

Теҥызыште служитлаш куштылго огыл, пеҥгыдылык, чытымаш кўлыт. Икте-весылан эре полшен шогыман, вет тыйын илышет шукыж годым йолташетын полшымыж дечын шога. Моряк-влак ик кугу механизмын изи винтикше-влак улыт: ик винтикше пудырга гын, пӱтынь механизм шаланен кертеш. Флотышто мый 1966 ий марте служитлышым, мӧҥгеш 1 статьян корабельный старшина званий дене пӧртыльым.

- Службына нерген раш ойлымыланда кугу тау. А тачысе событий нерген мом каласен кертыда? Вет тачысе кечын «Морякам, Отечеству служившим» шырнымаш палылан негыз пышталтеш.

- Мый тиде суапле пашам ышташ тӱҥалше-влаклан тау мутым ойлем. Р. Мукимов вуйлатыме инициативный группа кугу пашам ыштен. Ынде мыланна службынам шарнен, йолташна-влак дене мутланен шинчаш посна вер уло. Район администрацийлан, Мишкан сельсоветлан шарнымаш палым шогалташ верым ойырымыштлан кугу тау. Пайрем пеш ямлын да йомартлын эртен.

P.S. Тиде суапле пашан организаторжо-влак ўшанат: нунын деке моло моряк-влакат ушнат да тӱҥалме пашам мучаш марте шукташ полшат.

Венера АГЛЯМОВА.