Кугешнаш вер уло

Кугешнаш вер уло

Мишкан район тӱрлӧ республиканский мероприятийлаште шкенжын нерген икымше гана огыл палдарен.

Но тенийсе палдарымаш посна сынан лийын - «Башкортостанын историй лаштыклаже» фестиваль-марафон шочмо республикынан 100 ияш юбилейжылан лӱмлалтын. Проект Республик вуйлатышын полшымыж дене эртаралтеш. Фестиваль-марафоным Башкортостан Республикысе культура министерство, БР-се Калык-влак келшымаш пєрт да Тӱнямбал пошкырт курултай ямдыленыт да эртарат.

Концерт-презентаций деч ончыч Башгосфилармонийын фойештыже районын историйже, илышыже да культурыж дене палдарыше выставкым организоватлыме. Выставка тыгак районысо ял озанлык-влакын, ДРСУ-н, образований системын, агропромышленный колледжын, «Путник» ешартыш образований учрежденийын, Мишкан рӱдӧ районный больницын, ветеран-влак советын, культура отделын, марий историй да культура рӱдерын пашашт дене палдарен. Туштак мемнан спорт- сменна-влакын сеҥымашышт, самырык движений, районын литературный картыж дене палдарыше стенд-влак верланеныт. А литератур пашаеҥ-влак районыштына ятырын улыт: Яныш Ялкайн, Флорид Буляков, Шайхзада Бабич, Али Карнай, Михаил Белов, Вячеслав Абукаев-Эмгак, Юрий Байгуза, Анатолий Бик, Кирей Мерген да моло. Районын илышыж нерген фотохудожник Вадим Мадияровын фотографийышт-влак палдареныт, ончышо-влакын кумылыштым тыгак сӱретлаш да тӱрлӧ кидпашалан мастар-влак Рим ден Дим Галимовмытын, Валентина Янгуатован, Валентина Петрован да молын пашашт савыреныт.

Презентаций район нерген видеороликым ончыктымаш гыч тӱҥалын. Пайрем мероприятийым вӱдышӧ-влак Радион Плотников ден Регина Исмагилова шерге уна-влак дене палдареныт. Презентацийышке тиде кечын уна семын Башкортостан Республикысе культура министрын заместительже Раниса Алтынбаева, БР Вуйлатыше управленийын верысе самоуправлений орган-влак дене паша шотышто тӱҥ советникше Арслан Шагаретдинов, Башкортостан Республикысе Калык-влак келшымаш пӧртын директоржо Азат Ибрагимов, Тӱнямбал пошкырт курултайын исполкомжо председатель Данир Гайнуллин, БР-се Государственный Погын – Курултайын депутатше Рустем Мусабиров, БР-се Мишкан район муниципальный район администраций вуйлатыше Рустам Мусин, БР-се Мияке район муниципальный район администраций вуйлатыше Ришат Актуганов, Россий паралимпийский сборный командын членже, Россий спортын заслуженный мастерже, паралимпийский модмашын ече ден таҥасымаш да биатлон дене ятыр гана чемпионжо Кирилл Михайлов, БР-се МВД-н тӱҥ государственный инспекторжо Динар Гильмутдинов миеныт.

Тылеч вара уна ден презентацийыш толшо калыкым районын историйже дене кӱчыкын палдарыме. Ончышо-влак артист-влак дене пырля икмыняр курым ожсо жапыш вонченыт, Мишкан кундемыш куснен толшо икымше еҥ-влакым ужыныт. Нунын куштылго огыл, но чыла нелылыкымат сеҥаш ямде улмышт нерген видеоролик, муро да куштымаш-влак гоч ончыктымо. Вӱдышӧ-влак районын историйже нерген палдареныт, Кугу Отечественный сарын геройжо, паша подвиг, районын лӱмлӧ еҥже-влак нерген ойленыт.

Мишкан мланде тачысе кечылаштат лӱмлӧ эргыже да ӱдыржӧ-влак дене чапланен ила. Тидым презентаций годым ончыктымо концерт программа пеҥгыдемден. Зритель-влак ончылно мемнан эн сай артистна-влак усталыкыштым ончыктеныт: «Эрвел» куштышо калык ансамбль да мурызо Алексей Ибулаев, «Ӱжара» мурышо калык ансамбль да Светлана Каншаева, «Ручейки» фольклор калык ансамбль да Ильфак Арсланов, «Юго» куштышо калык ансамбль да Азат Ханов, «Ший памаш» фольклор калык ансамбль да Нагим Бабичев, Кристина Ильтимирова да Надежда Иванова, Diamond kids да Марсель Салимов, Анастасия Иванова да марий калык хор, Равия Саматова да Гузель Булякова.

Мероприятий вӱдышӧ-влак Мишкан районын гербше, флагше да гимнже нерген палдареныт, тӱс да изображений-влак мом символизироватлыме нерген ойленыт.

Тылеч вара сценышке Мишкан да Мияке район администраций вуйлатыше-влак да Россий МВД-н БР-се управленийжын тӱҥ государственный инспекторжо Динар Гильмутдинов лектыныт. Мутым эн ончыч налмеке, Динар Загитович шочмо кундемже дене кугешнен илымыж нерген ойлен да тыгай ямле пайремым эртарымыштлан алал кумылын тауштен.

Тауштыме шомакым Мишкан район муниципальный район администраций вуйлатыше Рустам Мусинат ойлен. Тудо зритель-влакым ончаш толмыштлан, организатор ден артист-влакым тыгай ямле пайремым ямдылымыштлан да эртарымыштлан алал кумылын тауштен. Тауштыме шомакыштыже район администраций вуйлатыше тыгак Мишкан районышто тӱрлӧ калык – марий, татар, руш да пошкырт-влак келшен илымым палемден. Тылеч вара Рустам Маратович Башкортостан Республиклан 100 ий теммылан лўмлалтше фестиваль-марафонын штандартшым Мияке район муниципальный район администраций вуйлатышылан кучыктен.

Эстафетым налмеке, Ришат Габдрашитович Мишкан районын презентацийже ямле, кундемын историйже дене да калыкын культурыжо да илышыж ден раш палдарыше лиймым палемден. Тудланат ик жаплан Мишкан районын шочшыжо улмыла чучын улмаш. Тылеч вара Ришат Габдрашитович мемнамат Мияке районын презентацийышкыже ӱжын. Пӧлек-влак дене пєлалтмеке, район администраций вуйлатыше-влак икте-весыштлан район герб-влакым пӧлекленыт, вуйлатыше-влак сценыште верым артист-влаклан пуеныт. Артист-влак мучашлан чолга марий «тывырдыкым» кушташ лектыныт да куштымашке пайремыш толшо кажне еҥым ӱжыныт. Ик жаплан Башгосфилармонийын сценыж дене зрительный залже куштышо-влакым да пайремыш толшо пӱтынь калыкым ушен шогышо чумыр площадкышке савырнен.

Фирдаус КАДИКОВА.