Кече, юж, вӱд да занятий-влак

Кече, юж, вӱд да занятий-влак

Тиде рӱдер Краснодар крайысе Сукко поселкышто, Шем теҥыз серыште верланен. Кумшо сменашке Российысе 48 кундем гыч 700 ӱдыр-рвезе каненыт. «Мастар-влак ола» образовательный программа кышкарыште мый тӱрлӧ оҥай профессий, научный открытий да техника дене палыме лийым. «Ончыкылык парк» профессий-влак рӱдерыште кажне кечын 20 направлений почеш занятий-влак эртеныт. Мый флористикым ойырен нальым.

Тыгак СОМ-влак лийыныт. СОМ – тиде сквозной образовательный модуль. Тыште мый да мемнан отряд гыч ятыр еҥже волейболым ойырен налын.

Смена мучко тыгак «Профессий-влак кучедалмаш» эртен. Тушто кажне отряд посна профессийым ойырен налшаш лийын. «Кучедалмаш» кум тур гыч шоген: палдарымаш, интеллектуальный, творческий. Мемнан отряд парикмахер пашам ойырен налын.

Лагерьыште кажне кече оҥайын да пайдалын эртен. Яра жапна йӧршын лийын огыл, манаш лиеш. Игече эре сай шоген, зарядкым южышто – стадионышто ыштенна. Кажне кастене могай-гынат мероприятий эртен. Отряд дене ик гана гына огыл теҥыз воктеке миенна. Мылам тыгак «Кандыра ола» деке экскурсий келшен. Вожатыйна-влак, Аня ден Сережа, поро да сай лийыныт. Нуно мыланна чыла шотыштат полшеныт, заданий-влакым сайынрак шукташ кумылаҥден шогеныт. Кас еда «изи сорта» мутланымаш эртен, тушто кажне еҥ эртыше кече нерген шонымашыжым ойлен.

2 арня пеш писын эртен кайыш. Мыланна икте-весына дене чеверласаш моткоч неле ыле. Вет ты жапыште ме пеҥгыде йолташ лийын шуктенна. Мый тыгай чапле да оҥай лагерьыште канымемлан моткоч куаненам. Йӧн лиеш гын, тушко эше ик гана уло кумылын каем. Лагерьыш миен толаш йӧным ыштымыжлан «Путник» йоча туризм рўдерын директоржо В. Князевлан чон гыч лекше тау мутым ойлем.

Надежда АЙГУЗИНА,

«Спортивный туризм» йоча ушемын воспитанницыже.