«Кажне мурыштем - илыш»

«Кажне мурыштем - илыш»

Тиде уста мурызын да семмастарын лӱмжым Пошкырт кундемысе чыла марий сайын пала. А Мишкан да Бирск районласе марий-влак нерген ойлыманат огыл. Еҥ-влак тудын концерт дене толмыжым эре вучат. Вет ты артистын мурыжо-влак ала-могай юзо виян, умылтараш лийдыме поро шўлышан улыт. Тидын дене келшаш веле кодеш.

- Кызыт мый уло чонем да ушем дене концертым эртарен колтымо пашаште улам, - манеш Станислав Алексеевич. - Музыкант-влак дене вашлийына, ямдылалтына.

Технический йодыш-влакым шотыш кондыман, организационный сомылымат шуктыман. Тиде - моткоч кугу паша. Чонышто куан ден тургыжланымаш - иканаште. Ямде лийде, иканат калык ончыко лекмаш уке.

Концертыште молыгунамсе семынак «Мастар» группа семӱзгар дене шокташ тӱҥалеш. Теният 4 апрельыште Станислав Шакиров «Мастар» группа дене мишкан калык ончыко «Кумло ий кугу сценыште» программа дене лектеш. С. Шакиров кажне мурыжлан аранжировкым шке ышта. Пеш шуко семӱзгарым шоктен мошта: гитар, барабан-влак, бас гитар, шиялтыш, тальянка да молат. Тидыжым концертым ик гана ончышо еҥ шке шинчаж дене ужын. Концерт программыштыже ончычсо кумдан палыме муро-влакат

улыт.

- Тошто муро-влакым у семын келыштарен, вес кумыл дене мурем, - манеш уста мурызо. - Музык да муро - тиде умылтарен мошташ лийдыме юзо вий. Мый тиде вийым шижам, муро гоч рашрак ончыкташ тыршем. Мый кажне мурышкем чонемым пыштем. Ик мутымак тӱрлӧ интонаций дене каласаш лиеш. Тидым чылан огыт умыло, но кажныже шижеш. Кажне муро - илышын ик ужашыже.

Артистын ойлымыж почеш, мурызо йылмым сайын палышаш, тудым шижын моштышаш.

- Сем ден мут икте-весышт дене ойыраш лийдыме лийшаш улыт. Нунылан ик тичмаш лийман. Мут ден семым тыглай гына «тушкен» шындаш ок лий. Колыштшо еҥ чыла тидым шижеш. Сандене мый кажне муремлан келшен толшо почеламут-влакым кычалам, - чон почын ойла Станислав Шакиров.

4 апрельыште 19 шагатыште Мишкан Культура дворецыш Станислав Шакировын мурыжым йєратыше чыла еҥым пагален ўжына.

Валерий АБУКАЕВ.