Илышыш путевкым налыныт

Илышыш путевкым налыныт

Эртыше арняште нине тунемше-влаклан пытартыш гана оҥгыр йӱк йоҥгалтын.

Илышыште кӱлешан профессийым налын, колледж дене 2, 7, 9, 11, 13 да 19-ше группылаште тунемше студент-влак чеверласеныт. Нуно пытартыш кечын, мотор вургемым чиен, агроколледж зданий ончылно пайрем линейкышке шогалыныт.

Тунемше-влакым идалык еда ужата гынат, агроколледжын директоржо Валерий Байбулатовын чеверласыме шомакыштыже шӱлыкаҥмаш раш шижылтын. Тудым умылаш лиеш, В. Байбулатовлан кажне студентше моткоч шерге, тудо чылаштынат усталыкыштым, илышыште шке верыштым муын кертшашлыкым сайын пала.

- Ончылныда цельым шындыза да тудын деке нимогай чаракым ончыде, шеҥгек чакныде, ошкылза, - каласен Валерий Тимиргалиевич. – Еҥын пашажым аклыза, шкат пашам тыршен ыштыза, тек тендан илышда волгыдо да пиалан, тӱрлӧ оҥай событийлан поян лиеш.

Тылеч вара выпускник-влакым саламлаш БР-се ял озанлык министерствын научнообразовательный учрежденийже-влак дене кылым кучымо шотышто отделжын экспертше Алефтина Пецко ушнен.

- Тендан илыш корныда икгай ок лий, тудын могай лийшашыже шкендан дечын шога. Чын корнымьойырен налза, тек ачада ден авада тендан дене да тендам туныктышо педагог-влак дене кугешнен илат, а ончыкыжым тек икшывыда-влакат кугешнаш тӱҥалыт.

Выпускник-влакым саламлаш линейкышке Мишкан сельсовет СП администраций вуйлатыше Рустам Ишмакаев миен.

- Те нимучашдыме шерге капиталым – илышыште кӱлешан профессийым налында, - каласен тудо. – Тиде поянлык дене кузе пайдаланымыда лач тендан дечын шога. Ойырен налме профессийдалан ўшанле кодса, туныктышыда-влакым ида мондо, вет нуно тендам уло чоныштым пыштен туныкташ тыршеныт.

Выпускник-влакым тиде кечын тыгак педагогический пашан ветеранже Салават Андерзянов, калыклан паша верым ситарыме шотышто йӱдвел межрайонный рӱдерын Мишкан районысо отделжын специалистше Татьяна Гордеева саламленыт. Т. Гордеева салам шомакше деч вара калыклан паша верым ситарыше рӱдерын выпускник-влаклан стажировкым эрташ полшышо программа дене палдарен.

Выпускник-влакым саламлаш «Эрвел» куштышо калык ансамбль вуйлатыше Ирина Имаеват миен. Тудын чеверласыме шомакым ойлымыж годым эсогыл шинчавӱдшӧ лектын, вет агроколледжым пытарыше икмыняр студентым тудо уже ятыр ий туныктен, пырля тӱрлӧ вере гастрольышко коштыныт. Ирина Елисеевна ансамбльын участникше-влаклан тауштыме серышым кучыктен да волгыдо пиалым муаш тыланен.

Куштызо-влакым палемдымеке, выпускник-влаклан тыланымаш да колледжыште туныктышо-влаклан тауштыме шомакым пашан ветеранже Константин Павлов ден Тамара Мусина (ача-ава-влак лӱм дене) ойленыт.

Нунын деч вара мутым выпускник-влакын класс вуйлатышышт Зарема Садировалан пуымо. Тудет, иканаште шӱлыкаҥын да кугешнен, тунемшыже-влаклан сай айдеме лияш да илышыште шке верыштым муаш тыланен. З. Садирован тыланымашыж деч вара агроколледжын директоржо Валерий Байбулатов тунеммаште ойыртемалтше, колледжын мер да спорт илышыштыже чолган участвоватлыше, тӱрлӧ олимпиада ден конкурслаште сеҥыше-влаклан тауштыме серышым кучыктен.

Тылеч вара эн вучымо – оҥгырым пытартыш гана рӱзен савырныме тат шуын. Пытартыш оҥгыр йӱкым пуаш чапым «Тракторист-машинист сельскохозяйственного производства» профессий почеш квалифицированный пашаеҥ-влакым ямдылыме образовательный программа почеш республиканский олимпиадыште сеҥыше Кирилл Александров ден республик кӱкшытан тӱрлӧ олимпиада ден конкурслаште, «Самырык профессионал-влак» региональный чемпионатыште (поварское дело) ойыртемалтше Кристина Асмандияровалан пуымо.

Агроколледж дене чеварласыме тат писын эртен. Выпускник-влакым ончылно кугыеҥ илыш вуча. Но нунылан лӱдшаш

уке, вет чылаштынат кидыштышт илышыш путевка – кӱлешан профессийым налмышт нерген дипломышт уло.

Фирдаус КАДИКОВА.