Ик фотокартычкын историйже

Ик фотокартычкын историйже

Мый, Изибаев (Макаров) Алексей Александрович, тиде фото нерген шонымашемым возынем. Фотокартычкыште ончыл радамыште Арзамат школым ыштыше плотник-влак шинчат. Покшелне шинчышыже, шола гыч кумышо, мыйын кочам Макаров Фёдор Макарович. Изи годсек ачамын ойлымыжым шарнем, «ме Макаров улына» манмыжым. Тыге ойлымыжо вуешем кодын, мый кузежым-можым кычалаш тӱҥльым.

Тиде фотом 16 ий кычальым, теве ынде муым. Кочам чодыра пашам ыштен, лесник лийын. Ватыж дене коктын иленыт, икшывышт лийын огыл. Ватыжын лўмжє Аксыле. Икшывышт лийдымылан кӧра ойырленыт. Аксыле шочмо Шогертен ялышкыже каен, марлан, я мӧҥгыжӧ пӧртылын - ом пале. Макар Вӧдыр Арзаматыште кодын. Иленыт кызытсе Аликаев Радик-влакын пӧрт олмышто.

Пексыле ковам изинекак тулык кушкын. Илышыштыже пеш шуко йӧсым ужын. Ковамын ушан мутшо-влакым кызытат шарнем: «икшывын кеч могай гынат ача-аваже лийшаш», «шочат гын, илет, илет гын, ужат», «иле шылыш тул ок пиж», «Ӱмыр тӧшакыште пєрдалат гынат эрта, терысыште пєрдалат гынат эрта».

Пексыле ковам Изибаев Изыбай Изибаевичлан марлан лектын, кок эргым, Андерзан ден Андрим, шочыктен. Изыбай 1942 ийыште сӧйыш каен, тушечын пєртылын огыл. Ковам «минеш пудешталтын» манын ойла ыле. Сӧй годым пеш йӧсӧ лийын. Илен-толын эргышт-влак ешым погеныт. Ачам изаж деч 19 ийлан изирак. Ковам ачамлан Изибаев фамилийым пуен, а Отчествыжым шке ачажыным пуен - Фёдорович.

Ик оҥайым шарналтышым: кугече пайрем кечын ковам «сорта ышташ шиште уке, эргым, пошкудыш миен тол, Сакиба кокат деч йодын тол» мане. Мый пошкудыш куржым, шиштым налын тольым. Сортам ышташ тӱҥална, шиштыш тул огешак пиж, йога да вола. Ковам пошкудым вурса: еҥ еҥлан сайжым пуа мо?! Сорта кече эртен кайыш, авам ковамлан ойла: «Пошкудо вет шиштым огыл пуен, тудо пластилиным мылам кучыктен колтен». Ковам дене кужу жап воштылна вара.

Ачам, салтак гыч пӧртылмекыже, кочамын шўгарышкыже лапка кӱым пыштен, тушан товар дене руэн возен: Макаров Фёдор Макарович. 3.10.56 г. Ачам шке ачажым ик ганат ужын огыл. Кочамын колымыж годым тудлан кум тылзе веле лийын. А кызыт тудо, Изибаев (Макаров) Александр Федорович, шкеат кочай лийын - индеш уныкан.

Авам, Изибаева (Алкиева) Наталья Айкашевна, ачам дене икымше класс гычак пырля улыт.

Ме нунын кум икшывышт - Татьяна (Чачи), Алексей (Ольош), Максим - улына.

Марий-влак тыге маныт: ачажым ончен эргыжлан марлан лек, аважым ончен ўдыржым марлан нал. Мый эре ачамым ончен илем. Мом палем, мом ыштен моштем - чыла ачам дечын налынам. Юмылан тау, мыйын ачам, авам улыт.

Изибаев (Макаров) Алексей Арзамат