Еш, йӧратымаш да ӱшанле улмаш кечым палмеденыт

Еш, йӧратымаш да ӱшанле улмаш кечым палмеденыт

5 июльышто Мишкан селаште Еш, йӧратымаш да ӱшанле улмаш кечылан лӱмлалтше торжественный мероприятий эртен

Еш – кажне еҥын эн шерге да ӱшанле эҥертышыже. Айдемын илышыже лач ешыште тӱҥалеш, тушто тудо кушкеш, икымше шинчымашым налеш, койыш-шоктышыжо тапталтеш.

Российыште Еш, йӧратымаш да ӱшанле улмаш кече 8 июльышто палемдалтеш. Тиде кече Муром олаште илыше шнуй Петр ден Февроньялан лӱмлалтын, нуно еш илыш серлагышлан шотлалтыт.

Пайрем вашеш, 5 июльышто, ЗАГС-ын Мишкан межрайонный отделыштыже кок самырык мужыр возалтын: Алексей Исеметов ден Анжела Сайдуганова да Юлиан Валиев ден Лиана Кансафарова.

Алексей ден Анжела 2017 ийыште Мишкан селаште палыме лийыныт. Ик ий гыч рвезе таҥжым марлан лекташ йодын. Юлиан ден Лиана Пӱрӧ олаште палыме лийыныт, нуно икте-весыштым ик гана ужмаш гычак йӧратен шынденыт.

Торжественный мероприятийыште самырык-влк деч посна «шӧртньӧ» юбиляр-влакым - Тошто Атнагул ялыште илыше Фаузина ден Замиль Зарифуллинмытым палемдыме. Нуно ынде пел курым пырля ваш келшен илат, кок эргым, ӱдырым ончен куштеныт, 6 уныкашт уло. Зарифуллинмыт самырык мужыр-влакым шокшын саламленыт да нунын семынак кужу ӱмырым пырля илаш тыланеныт.

Саламлымашке тыгак Мишкан район муниципальный район администраций вуйлатыше П. Трапезников ушнен. Павел Владимирович самырык-влаклан ваш келшен илаш да Зарифуллинмыт деч примерым налаш тыланен.

Еш, йӧратымаш да ӱшанле улмаш кечылан лӱмлалтше мероприятийышке РФ Государственный Думын депутатше Г. Омаров толын. Тудат самырык-влакым шокшын саламлен да «шӧртньӧ» юбиляр-влаклан кужу деч кужу ӱмырым тыланен.

Мероприятий пырля возалтмаш дене пытен, пайремым сылне муро дене О. Мусалина сӧрастарен.

Гузель ЯХИНА.