«Эрыкан мурызо улам»

«Эрыкан мурызо улам»

Константин Зайнетдиновын лўмжє марий калык коклаште кумдан шарлен. Самодеятельный композитор, автор-исполнитель, марий эстрада шӱдыр 55 ияш лўмгечыжым палемдаш ямдылалтеш. Тидын вашеш ме тудын дене вашлийын, муро аланыш толмо корныж нерген изишак мутланышна.

- Костя, марий эстрада муро аланыште лӱмет кумдан шарлен. Йошкар-Олаште кокымшо марий эстрада муро фестивальыште «Кок пушеҥге» мурет дене Гран-прим налметым сайын шарнем. А мурым возаш, мураш кунам тӱҥалынат?

- Музиканым куд ияшак шокташ тунемынам, гитарым Йӱдвел флотышто служитлымем годым перкалаш тӱҥалынам. Школышто тунеммем годым мураш вожылам ыле, сандене мурен омыл, а кумыл лийын. Тиде вожылмашым служба деч вара, Пӱрӧ оласе 102-шо СПТУ-то музыкантлан пашам ыштымем годым сеҥенам да сцена гыч мураш тӱҥалынам. Тушто пашам ыштымем годымак муро семым келыштараш да мутшымат возгалаш тӧченам. Туштак «Кок пушеҥге» муро шочо. Тиде 1988 ийыште лийын. 1991 ийыште Саша Абдуловын ӱжмыж почеш марий муро фестивальыш мийышым. Лач тушто «Кок пушеҥге» муро дене Гран-прим налынам.

- Музыкальный грамотет уло?

- Пӱрӧ олаште пашам ыштыме жапыште Стерлитамак культпросвет училищым заочно тунем лектынам. Бирск деч вара ик ий ты районысо Бурно ялыште художественный вуйлатышылан ыштышым. Вара Йошкар-Олашке марий филармонийыш пашаш ӱжыч. Вик келшышым, «Элнет» вокально-инструментальный ансамбльыш солистлан, мурызылан нальыч. Тиде группышто ик ий гына пашам ыштен шуктышым. Гастроль дене коштынна, шкенан районышкат толынна, но ту саманым шкеат паледа, могай лийын. Пашадарым тӱлен огытыл, кочкаш налаш нимо дене. Тыге «Элнет» ансамбльат шаланыш. Йошкар-Олаште мотор Морко ўдырым марлан нальым. Ончык пуренак каласем, эргым да ӱдырем шочыныт. Кызыт нуно кугемыныт, коктынат Америкыште, Лос-Анджелесыште илат. Коча лийынам.

- «Элнет» ансамбль деч вара корнет кушкыла шуйнен?

- Уэш шочмо кундемыш пӧртылынам, Бирский оласе ГПТУ-што музыкантлан ышташ тӱҥальым. Шым ият пеле тушто самырык ӱдыр-влакым мураш туныктенам.

- Костя, ийготет вачӱмбалне шагал огыл погынен. Кок визытаным чумыренат. 55 ияш юбилейым палемдаш ямдылалтат. Ты жапыште чылаже мыняр мурет шочын?

- Возаш тӱҥалме жап гыч таче марте мутшат да семжат шкемын 70 муро чумырген. Моло автор-влакын возымо почеламут-влаклан келыштарыме семым тышке пуртен омыл.

- Кызыт кушто илет да могай пашам ыштет?

- Шочмо Озерка ялыштем илем, эрыкан мурызо улам. Йолташ-влак дене чумырген коклан-коклан яллашке концерт дене лектын коштына. Вет киндым налаш оксам кузе-гынат ыштыман.

- Юбилей лӱмеш мемнам, марий-влакым, мо дене куандараш шонет?

- 55 ияш лўмгечемым юбилейный концерт дене палемдынем. Тудым Мишкан Культура дворецыште 26 февральыште эртараш ямдылалтам. Кумылан-влакым ты кечын 19 шагатыште Мишкан РДК-шке ӱжам. Тиде кастене гитара, баян дене у мурем-влакым йоҥгалтарем. Тыгак мурызо йолташем-влак, Культура дворецын артистше-влак ты касым сӧрастараш полшат. Толза, пырля муралтена, кушталтена, каналтена. Ӧкынаш огыда тӱҥал.

Валерий Абукаев мутланен.