Эрласе кечылан ӱшанен

Эрласе кечылан ӱшанен

Тений тыгай верлан Самвел Кштаевын озанлыкшым ойырымо. Палемден кодаш кӱлеш, ты озанлыкысе ял озанлык пашаеҥ-влак ий гыч

ийыш паша лектышыштым кугемден толыт. Кормам ямдылыме шотыштат моло деч ойыртемалтыт. Мутат уке, тыгай кугу мероприятийлан мланде пашаеҥ-влакат, механизатор-влакат, озанлык вуйлатыше-влакат чотак ямдылалтыныт. Кормам ямдылымаште пашам ышташ тӱҥалше чыла техникым ямдылык линейкыш шогалтеныт.

Семинар кечын Кугу Соказа Культура пӧртышкӧ чыла собственностьян озанлык вуйлатыше-влак чумыргеныт. Вет тыгай погынышто

шке паша опыт дене палдараш да весе-влакын сай опытыштым пален налаш лиеш.

Семинарын теоретический ужашыжым ял озанлык отдел вуйлатыше В. Михайлов почын. Тудо семинарыш толшо-влаклан черетан

тургым жап лишемме нерген шижтарен да тиде мероприятийыш толшо республикын представительже-влак дене палдарен.

Вил Яковлевич шке выступленийыштыже эн тӱҥ верым кургын качествыжлан ойыраш кӱлмӧ нерген палемден. Мемнан район пасу пашам ышта да вольыкым ашна. Сандене тӱҥ корныжо ял озанлык паша маныт. Ожно колхоз ден совхозлаште пасу паша ден вольык озанлык коклаште ойыраш лийдыме кыл лийын. Кажне колхоз тӱжем гектар дене пасум курал-ӱден, тӱжем вуй дене вольыкым ончен. Кажне суртышто ик-кок ушкал, шуко шорык да моло вольыкым, юто-вусым ашненыт. Мутат уке, илыш вашталтме дене пырля совет

пагытысе поро йӱла, паша-влакат мондалт толыт. Кугу колхоз-влакым шалатен пытарышт, ял калык суртышто вольыкым ончымым чарныш.

Шӱдӧ ий ончыч лийше революций деч ончычсо гаяк изи озанлык-влак шочыныт: КФХ, ЛПХ да молат. Южо КФХ-же ончычсо колхоз кугыт мландымак айла да тунамсе пашамак шукта. Но парышыже гына государствылан огыл, а озанлык вуйлатыше поянлан кая.

С. Ш. Кштаевын крестьян-фермер озанлыкше ончычсо Калинин лӱмеш колхозышто верланен. 600 вуй тӱкан кугу вольыкым ашна, шӧрым, шылым ужала, шурным кушта. А шӧр ден шылым ыштен налаш кургым ситышын ямдылыман. Кодший ты озанлык кургым чыла вольыклан ситышын ямдылен, теле гоч пукшенат пытарен огыл. Сандене тений нунын опытышт дене палыме лияш семинарым тушакын эртараш палемденыт.

Тыгай семинарын кӱлешлыкше нерген район вуйлатыше В. Трапезников ойлен. Семинарын теоретический ужашше деч вара участник-влак пасушко лектыныт. Тушто шудо тургымышто пашам ышташ ямдылалтше трактор, комбайн да машина-влакым онченыт. Тыште икмыняр тӱрлӧ комбайн, КамАЗ машина-влак, трактор дене шудым удыраш келыштарыме шорвондо-влак, силосым опташ ямдылыме техника лийыныт. Озанлык вуйлатыше С. Кштаев, районысо ял озанлык отделын тӱҥ агрономжо Р. Бариев, ял озанлык отдел вуйлатыше В. Михайлов техникын пашам ышташ ямде улмыжым текшырен лекмекышт, верысе специалист ден механизатор-влаклан тургым жаплан сайын ямдылалтмыштлан таум каласеныт.

В. КОНДОГИН.