Ечыгорно тазалыкым шуара

Ечыгорно тазалыкым шуара

Тыгай таҥасымаш кажне ийын эрта да эре кугу спорт пайремыш савырна. Тушто профессиональный ечызе-влак, спортым йӧратыше

тӱрлӧ ийготан тыглай еҥ-влак участвоватлат.

Тений 30 градус йӱштӧ лийын гынат, спортым йӧратыше-влак сабантуй олыкыш пеш шукын чумыргеныт. Тӱшка стартыште 311 еҥ куржын, ончаш да нуным кумылаҥдаш толшо-влакат тынарак лийыныт, очыни.

Таҥасымаш тӱҥалме деч ончыч участник-влакым район администраций вуйлатышын заместительже Л. Александрова, вич гана паралимпийский модмашын чемпионжо К. Михайлов, образований отделын профсоюз председательже, методкабинетым вуйлатыше Л. Мустафина, районысо физический культура, спорт, туризм да молодежный политика комитетын председательже Р. Ямаев саламленыт. Тыштак увертареныт, игече йӱштылан кӧра дистанцийым кӱчыкемдыме: 3 километр олмеш 1 километрым, 5 километр олмеш 3 километрым куржман.

Мутат уке, таҥасымашын эн чолга участникше-влак районысо школлаште тунемше-влак лийыныт. Тиде гана райцентрысе, Тымбай, Ардаш, Кугу Соказа, Чорай, Кугу Шаде школла гыч эн шукын толыныт. Тыгак сельский совет-влакын, йоча сад-влакын, РОНО, ОВД, ЦБС пашаеҥ-влак рӱжге толыныт. Конешне, агропромышленный колледж деч посна районышто ик таҥасымашат ок эрте.

12 шагат кечывалым VIP-куржмаш лийын. Тушто муниципальный учреждений вуйлатыше-влак куржыныт. Тиде куржмаште пӧръеҥ-влак коклаште икымше верым районысо физический культура, спорт, туризм да молодежный политика комитет председатель Р. Ямаев налын да шке примерже дене моло-влакым кумылаҥден.

Ӱдырамаш-влак коклаште Чорай сельсовет СП администраций вуйлатыше Г. Саймулукова сеҥен. 1-2, 3-4, 5-7, 8-11 класслаште

тунемше ӱдыр-влак коклаште тымбай-влак абсолютный чемпион лийыныт, а эрге-влак коклаште сеҥыше-влак коклашке Ардаш

школышто тунемше-влакат логалыныт. Нуно чыланат 1 километрым куржыныт.

Ӱдырамаш-влак коклаште шке тӱшкаштышт сеҥышыш лектыныт - С. Ялитова (Тымбай), И. Ахмадишина (Ардаш), М. Пасечник

(Кемий), Л. Дмитриева (Ардаш), Л. Ибагишева (Мишкан); пӧръеҥ-влак коклаште - В. Павлов (Монар), Ю. Павлов (Монар), С. Зайнитдинов (РОВД), Ю. Айгузин (Кугу Соказа), Р. Михайлов (Тымбай), Я. Апсатаров (Кемий).

Тӱшка куржмаште участвоватлыше-влак чыланат номеран жилетым налыныт да Российын ечыгорнышто участвоватлымыштым

шарналтен илаш шкаланышт коденыт. Сеҥыше-влак «Лыжня России» возыман упшым, граммотым да медальым налыныт.

Венера АГЛЯМОВА.