Еҥ-влакын илышыштым саемдаш

онысо Культура дворецыште Мишкан сельсовет СП советын 47-ше отчетный заседанийже эртен. Заседанийыште сельсоветын, райсоветын депутатше-влак, райцентрыште илыше-влак, район администрацийын, внутренний паша отделын, пожарный частьын представительышт участвоватленыт.

Мишкан сельсоветыште тачысе кечылан статистика почеш 7733 еҥ, похозяйственный учетын данныйже почеш 8425 еҥ ила. Сельсоветышке Мишкан села, Ленинский, Шаде Шогертен, Кигазытамак, Восход, Уял, Памаш ял-влак пурат.

Погынышо-влак ончылно отчетный доклад дене Мишкан сельсовет администраций вуйлатыше Р. Ишмакаев выступатлен. Тудо шке выступленийыштыже эртыше ийыште сельсовет администрацийын шуктымо пашаж-влак нерген ойлен, ончыкылык планым палемден. Чынжымак, сельский поселенийыште паша сайын мия. Ик ий жапыште гына райцентрысе, ялласе урем-влакым ятыр олмыктымо. Тўзатыме паша шукталтын. Цифр дене ончыкташ гын, сельский поселений бюджетын роскот ужашыже тыгайрак: тӱзатыме пашалан 8 171 417,25 теҥгем, электрический сетьым олмыкташ 291700 теҥгем, уремлам волгалтараш 1 047500 теҥгем кучылтмо.

Чумыр ончалмаште, 2018 ийыште бюджетын парыш ужашыже 96,83 процентлан (18 119 406, 79 теҥге), роскот ужашыже 96,71 процентлан (18 072 552,9 теҥге) темалтыныт.

Сельсовет администраций еҥ-влак дене пашам ыштымылан кугу верым ойыра. Отчетный жапыште администрацийышке 6348 йодмаш пурен, сельский поселений вуйлатыше деке 228 еҥ приемыш толын.

Пурышо йодмаш-влак коклаште еҥ-влак мланде, жилищно-коммунальный озанлык, илыме верым саемдыме, социальный илыш шотышто йодыш-влакым нӧлталыт. Сельский поселений вуйлатыше да администраций пашаеҥ-влак пурышо кажне йодмашлан раш вашмутым пуаш тыршат.

Жилищный комиссий (председатель В. Бикбаев) пашажым сайын шукта. 2018 ийыште илыме верым саемдаш учетыш шогалташ йодмаш дене 48 еҥ толын. Чыла йодмаш жилищный комиссийын заседанийлаштыже ончалтын, йодмашым пуышо-влакын кызытсе илыме верышт могай улмылан акт-влак ышталтыныт.

Сельский поселенийыште илыме верым чоҥымо паша сайын мия. 2018 ийыште 8099 квадратный метр кумдык илыме вер чоҥалтын. Еҥ-влак шке кӱшеш 82 пєртым чоҥеныт. Сельский верлаште илыме верым саемдыме федеральный целевой программа кышкарыште 5 еш илыме верым чоҥаш сертификатым налын. Илыме верым саемдаш целевой программышке пураш 41 ешым учетыш шогалтыме. 2018 ийыште 14 ешлан илыме верым чоҥаш мланде участкым пуымо.

Райцентрыште 67 урем уло, моло яллаште 31 урем. Тыге, поселений кӧргыштӧ уремлаште корнын кужытшо 103 километрыш чумырга. Кажныжым тӧрлаш кӱлеш.

Верысе инициативылан полшымо республиканский программыште участвоватлен Ленинский ялыште Ленин, Новостройка, Полевая урем-влак олмыкталтыныт. Корно фонд гыч пурышо окса кӱшеш Мишканыште Казаков, Мичурин, Новостройка, Ленин, Кооперативный, Дружба, Безымянный урем-влак асфальтироватлалтыныт. Памашыште Совхозный урем, Уялыште Светлый урем, Кигазытамакыште Социалистический урем тӧрлаталтыныт. ДРСУ Ленин, Мир, Интернациональный, Дружба, Яныш Ялкайн, Революционный, Пионерский, Тракторный уремлаште ямочный ремонт-влакым эртарен.

Еҥ-влакын полшымышт дене пырля Моркинская, Майская урем-влак, Трактовый, Актуганов, Ишкинин урем-влакын у микрорайонжо олмыкталтыныт. Олмыктымо урем-влакын чумыр кужытышт 8 километр.

Теле жапыште урем-влакым эрыкташ ончылгочак договор-влак ышталтыт.

Тӱзатыме паша сайын шукталтеш. Райцентрыште скульптура ден колонна-влакым олмыктымо, Памашыште, Кигазытамакыште, Ленинскийыште Кугу Отечественный сарышын участникше-влаклан памятник-влакым, Мишканыште Сеҥымаш мемориалым олмыктымо.

Ик пӱсӧ йодышлан шӱкшакым погымо йодыш шотлалтеш. Несанкционированный манме свалка-влакым пытарыме шотышто паша ятыр ышталтын гынат, эше ты проблема пӱсын шога.

Чумыр ончалмаште, 2018 ийыште сельский поселений администраций шке пашажым сайын шуктен.

- Мутат уке, палемдыме чыла пашанам шуктен огынал, но шуктымо пашан результатше 2019 ийыште ончылан шындыме задача-влакым шукташ ӱшаным шочыкта, - каласен мучаште Р. Ишмакаев. - 2019 ийыште ончычсо семынак пашаштына социальный политикылан, тӱзатыме пашалан, жилищно-коммунальный озанлыклан, корнылам олмыктымылан, шӱкшакым шупшыктымылан кугу верым ойыраш тӱҥалына.

Пренийыште райсоветын секретарьже Т. Коледина, МЧС-ын представительже С. Биктубаев, РОВД пашаеҥ С. Зайнетдинов выступатленыт.

Отчетный погынымаш ялласе чолга еҥ ден староста-влаклан Тауштыме серышым кучыктымо дене иктешлалтын.

Венера АГЛЯМОВА.