Ӱдырамаш пиал икшыве-влак пиалыште

Ӱдырамаш пиал икшыве-влак пиалыште

Наталья Леонидовна ден Алексей Геннадиевич шкештат шуко икшыван ешлаште шочын-кушкыныт. Очыни, тидлан кӧра ятыр икшывым

ончен кушташ кумылаҥыныт.

Ача-ава суртышто озаланыше алал кумыл ӱдыр чонышто волгыдо кышам коден. Марлан лекмеке, тудо икшывыже-влакымат лач тыгай ешыште кушташ шонен пыштен. Наталья ден Геннадий икте-весыштым изинек паленыт, йӧратымаш деч ончыч кок шӱм коклаште йоча келшымаш озаланен улмаш.

Геннадий Биктышевын ешыже, а ешыште чылаже вич икшыве лийын, Озерка гыч Новоселкышко илаш куснен. Пӧртым нуно Наташан ешыже илыме пӧрт воктене налыныт. Тыге иктаҥаш Наташа ден Алексей пырля модаш тӱҥалыныт. Коклан кредалыныт, пореммеке,

икте-весышт деке унала коштыныт, ик классыште тунемыныт, ик парт коклаште шинченыт. Кугем шумеке, нуно эше шукырак пырля лияш

тӱҥалыныт. Нуным когылляныштат келшыше вер, икгай интерес-влак ушен шогеныт.

9 классым тунем пытарымеке, Наташа Пӱрӧ оласе 102-шо ПУ-ш «Сурт озавате» факультетыш тунемаш пурен да повар профессийым налын.

Алексей 11 классым пытарен, тиде училищыштак автослесарьлан тунем лектын. Дипломым нуно ик ийыште налыныт. Но училище деч

вара Геннадий пашам ыштен шуктен огыл – виклан армийыш каен. Мужыраҥынат шуктен огытыл, Наташа ончыкылык пелашыжын

армий гыч толмыжым ик ияш Виолетта ӱдырышт дене вучен.

Пєртылмеке, рвезе виклан сєрасаш каен. Ача-ава суапым налмеке, самырык-влак сӱаным ыштеныт. Самырык-влак ик ий Алексейын

ача-аваж дене иленыт. Варажым самырык-влаклан у пӧртым чоҥаш кутырен келшыме. Пєртлан верым Озерка ялын калык коклаште «хутор» манме ужашыштыже ойырен налме. У пӧртым, ача-ава-влак полшымо дене, кок тылзе жапыште нӧлтен пытарыме.

Умбакыже еш илыш тӱҥалын. Наталья ден Геннадий вольыкым, ютым ончаш тӱҥалыныт, садым шынденыт, пакчаште тӱрлӧ кушкылым куштеныт. Ешышт писын кушкын. 2005 ийыште нунын Антон эргышт шочын, 2009 ийыште – Святослав эргышт, 2013 ийыште – Андрей, 2014 ийыште – Павел. Виола нуным чылаштымат ончен кушташ полшен, изи нянечка лийын, манаш лиеш.

Чаманаш кодеш, шочмо кундемыште еш вуйлан паша лектын огыл. Тидлан кӧра тудо йӱдвел кундемышке пашам кычалын каен, кызыт вахта йӧн дене лач тушто ышта. Ик тылзе ыштымеке, тудо шочмо суртышкыжо пєртылеш. Паша тыштат ситышын уло – у кок пачашан пєртым мучаш марте ыштен пытараш кӱлеш.

- Пӧрт кӧргыштӧ пашам пытарышаш, электричествым пуртышаш, отопленийым ыштышаш кодын. Икманаш, паша ситышын уло, но окса

дене шуаш ок лий, - шӱлыкаҥынрак ойла озавате. – Туге гынат, ме чыла тиде пашам тенияк пытараш да у суртышко илаш лекташ тыршена.

Икшыве-влак кушкыт, кажныжлан посна пӧлма кӱлеш. Чын, кызыт илыме пӧртыштышт тынар еҥлан вер шагалрак. Йоча-влак кок пачашан кроватьлаште малат, урокым ышташ вер шагал. Ситыдымашым лач кок пачашан пӧрт кораҥден кертеш. Наталья специальностьшо почеш повар улеш. Кызыт ӱдырамашын тӱҥ сомылжым ышта – сурт возакым арала.

Но еш бюджетымат пойдараш полша: изинек тунемме пашаже, а ӱдырамаш устан тӱрлен да пидын мошта, мыняр-гынат парышым

конда. Наталья заказ почеш тувыр-влакым тӱрла, свитер, йоча вургемым, пиж ден носки-влакым пидеш.

- А икшывыда-влак яра жапыштышт мом ышташ йӧратат? – йодым мый Наталья Леонидовна деч.

- Изирак-влак уло кумылын сӱретлат, кугурак-влак – Виолетта ден Антон куштат.

- А те шкеже кузе канеда?

- Мый шкат клубыш коштам, кокымшо ий верысе «Гроздья калины» ансамбльыште мурем. Конешне, кеҥежым мураш кошташ жап уке – паша шуко. Вет ме чылажымат шке ямдылена: пуым, шудым, вольык ден ютымат кечыгут ончыман. Юмылан тау, икшывына-влак чыла сомылымат ышташ полшаш йӧреныт.

- Пӱрымашда да илышланда ода ӧпкеле?

- Нигунам ӧпкелен омыл. Ынде уже 14 ий мый йӧратыме еҥем дене пырля илем, тудо мый денем чыла куанымат, кочымат лош пайла, пеленна куаным кондышо икшывына-влак улыт.

Ава шӱм – тиде йӧратымаш теҥыз, - ойла Наталья. – Тудо йӧратымаш кумыл дене кажне икшывыжым авалта. Тыште Наталья Леонидовна ӱдырамашын илыш пӱрымашыжым ужеш. Ӱдырамаш шкенжын сеҥымашыж деч коч икшывыже-влакын сайын тунеммыштлан, творческий сеҥымашыштлан куанен илышаш.

Лач тиде аван илышыже да пиалже.

Венера АГЛЯМОВА.