Чылажат пашаеҥ-влак деч шога

Чылажат пашаеҥ-влак деч шога

Ф. Фатыхов Караидель селасе ДРСУ-што пашам ышташ тӱҥалын. Самырыкше годымак шкенжын пашажым сайын палыше, чын профессионал улмыж дене ойыртемалтын. Тыршышан пашаеҥым «Башкиравтодор» АО предприятий вуйлатыше-влак эсапленыт. Тудлан Мишкан селасе ДРСУ-м вуйлаташ ӱшаным пуеныт.

Фидан Фаритович у верыште пашам кадр-влакым вашталтымаш гыч огыл, кӱлеш материалым ямдылыме, улшо техникым олмыктымаш, асфальт заводым расконсервироватлымаш гыч тӱҥалын.

Айдеме-влак дене ваш-кылым муын моштымыжлан кӧра, Ф. Фатыхов коллегыже-влак коклаште ятыр йолташым муын, ятырже деч пашалан тунемашат ӧрын огыл.

- Вет тунемаш нигунам эр да вараш огыл, - палемдыш Фидан Фаритович мутланымына годым. – Мишкан филиалым вуйлаташ тӱҥалаш ӱжмышт годым, мый мутым пеҥгыдын кучышашым сайын умыленам.

Мишкан ДРСУ-н историйже сеҥымашлан моткоч поян улеш. Организацийлан негызым кугу опытан дорожник Рауф Миннимуллинович Буляков пыштен. Мый тудын дене производственный совещанийлаште ик гана огыл вашлийынам. Мый эре тудын гай пашаеҥ лияш тыршенам.

- Те кузерак шонеда, тылзе – тиде шагал, але шагал огыл?

- - Вуйлатышылан тиде пеш кӱчык жап. Мый тиде жапыште коллектив дене палыме лийын, пашаеҥ-влакым производственный задача-влакым шукташ кумылаҥден, лушкыдырак участок-влакым рашемден, бригада-влакын пашаштым саемдаш йӧным эсаплен шуктенам.

Тӱрлӧ амаллан кӧра строительно-монтажный пашан лектышыже иземын гынат, ме 65805 тӱжем теҥге парышым налын кертынна. Кодший организацийышке экскаватор-погрузчик, икмыняр кугу КамАЗ, нунылан прицеп-влак толыныт.

- Коллективда, тӱҥ шотышто, могай пашам шукта?

- Ме чумыр шотышто 308 километр кужытан корным эскерена. Тушечын 161,99 километрже асфальтобетонный вакшышан корно, 141,96 километрже переходной вакшыш (шаргӱ, ошма) сынан, 5 километрже – тыглай корно. Тылеч посна ме корнышто верланыше 26 кӱварым, 280 вӱдым колтышо пучым, 37 автопавильоным, корно тӱрысӧ чарак-влакым да корно знак-влакым эскерена.

Производственный показатель шотышто, мемнан коллективна корным олмыктымо пашам сайын шуктен. Территориальный заказым тичмашын шуктенна. Ончылно шындыме задача-влакым шукташ пеӹгыде материально-технический база да тӱзык улшо 50 утла единица техника полшат. Но ДРСУ-н паша лектышыже, тӱҥ шотышто, техника деч огыл, а пашаеӹ-влак деч шога. Поро шомакым спецтехникын механизаторжо В. Ташбулатовлан, автогрейдерын машинистше Г. Александровлан, КамАЗ-влакым виктарыше-влак И. Фархутдиновлан, Г. Самигуллинлан да молылан ойлымо шуеш.

Вениамин КОНДОГИН.