«Чон куат деч моло чыла оружийым сеҥаш лиеш»

«Чон куат деч моло чыла оружийым сеҥаш лиеш»

24 январьыште райцентрысе Культура дворецын залышкыже шуко еҥ чумыр- ген. Тыште тӱҥ шотышто Мишкан школласе да агропромышленный колледжыште тунемше-влак лийыныт. Мероприятий Ленинградым блокада гыч утарымылан 75 ий теммылан лӱмлалтын.

РДК-н фойештыже библиотека пашаеҥ-влак «27 январь - фашист-влакын блокадыштым тӱрыснек пытарыме» книга выставкым ыштеныт.

Тиде кече Кугу Отечественный сарын лаштыкыштыже ик эн чап, но тыгодымак кугу трагедий кече семын возалт кодын. 900 кече йырым-йыр авыралтше ола тушман ончылан сукен шинчын огыл. Шужымаш, йӱштӧ, чер… кажне кечын тӱжем дене колышо-влак. Тушман олам аралыше да тушто илыше-влакым шужыктен, кылмыктен пушташ шонен. Но ола илен…

Чыла тидын нерген погынышо-влаклан мероприятийым вӱдышӧ В. Кутлуметов, самырык-влакын пашашт шотышто тӱҥ специалист О. Биктубаева, образований отделын методистше Л. Акбулдина каласкаленыт.

- Йоча да сар умылымаш-влак келшен огыт тол. Но тунам Ленинградыште илыше йоча-влак- лан кугыеҥ-влак дене пырля чыла нелылыкым сеҥаш пернен. Шужен, кылмен иленыт гынат, нуно сеҥымашлан ӱшаненыт…

Таче вуй ӱмбалнына тыныс кава. А тидланже миллион дене еҥ-влак шке илышыштым пуэныт. Нунын коклаште тендан ийготысо гай еҥ-влак шукын лийыныт. «А мый тыге ыштен кертам ыле мо?», - йодышым шкаланда пуыза да таче мыланна кузе илаш, тунемаш кӱлмым шындыза. Сар жапысе иктаҥашда-влак гай лияш тӧчыза.

Сар годым йоча жап деч посна кодшо-влаклан таче мемнан пагалымашна да тауштымашна кӱлыт. Вет сар жапысе йоча-влак кажне кечын шагалемыт. Тидын нерген ида мондо, - залыште шинчыше-влаклан чон вургыж ойлен Ляйсан Акбулдина.

Варажым залыште шинчыше-влаклан «Непокоренные» документальный фильмым ончыктымо. Тушто 900 кечаш тамык илыш нерген ойлалтеш.

Тиде кечынак рӱдӧ районный библиотекыште «Ленинградын блокадный киндыже» акций эртен. Тушко мийыше-влаклан кинде карточка да 125 грамм блокадный кинде шалаталтын.

Венера АГЛЯМОВА.