Чон дене шуктымо паша

Чон дене шуктымо паша

Нунын уҥган улмыштым районышто гына огыл, республике да регион кӱкшытыштат палат. Мутлан, 2017 ийыште «Марий йылмем – келшымаш йылме» акцийыш ушнен, тӱрлӧ пашам шуктеныт. Кажне ийын писатель-землякна Яныш Ялкайнын, В. Абукаев-Эмгакын шочмо кечыштым палемдымаш, нунын произведенийышт почеш лудмо конкурсым эртарымаш, Тиште, Талешке кечылам пайремлымаш школышто поро йӱлашке савырнен. Ты школысо тунемше-влак ятыр годсекак шочмо йылме олимпиадылаште эреак район, республике да регион кӱкшытыштӧ кӱкшӧ верлам сеҥен налыт. Кызыт нине пашалан нуным маровед-влак А. Л. Юзукбаева, А. Б. Чаплыгина, О. В. Иркабаева кумылаҥден шогат. Теният ий тӱҥалтыштак кокымшо гана Уфаште эртаралт- ше республик кӱкшытысӧ таҥасымаште О. В. Иркабаеван да А. Б. Чаплыгинан тунемшышт А. Тимиркаева ден Г. Губеева икымше, А. Миксонова ден Н. Алексеева призовой верлам сеҥен налыныт. Саламлена нуным!

Кодшо арняште районысо Культур пӧртыштӧ «Идалыкын туныктышыжо» конкурс эртен. Чорай селасе Я. Ялкайн лӱмеш марий гимназийын чапшым Анжела Чаплыгина арален да 3-шо верым налын. Тудымат тыгай кўкшыт дене саламлена!

Теве тыгак вӱргечын землякна, писатель В. А. Абукаев-Эмгакын 60 ияш лӱмгечыжлан пєлеклалтше мероприятийымат марий йылме туныктышо Анжела Леонидовна пеш моштен да оҥайын эртарыш. 1-ше ужаш литмонтаж семын эртаралте. Экраныште писательын ялже, шочмо изуремже, ачаже, аваже да моло сӱрет икте-весым алмаштат. Вӱдышӧ-влак шарныме мутым школ вуйлатыше И. Е. Андреевлан да мыланемат пуышт. Игорь Евгеньевич Токтар ял гыч улеш, сандене В. А. Абукаевын тӱҥалтыш класслаште нунын дене практикыште лиймыж годсым да молымат каласкалыш. Мый университетыште тунемме да варасе илыш нерген шарнен ойлышым.

Ныжыл, тыгодымак шӱм-чоныш логалше мурсем почеш вӱдышо-влак К. Воробьёв ден А. Миксонова палыме да пагалыме, тысе школын 9-10 класслам тунем пытарыше землякнан илыш корныжо да пашаж нерген кӱчыкын палдарышт. Каласкалыме коклаште сылне марий вургемым чийыше йоча-влак писательын возымыж дене кылдалтше мурым мурышт, почеламутым каласкалышт. 11 классыште тунемше-влак В. Сагитова ден В. Айгузин «Сорта йымал арака» ойлымашыж гыч ужашым чылт артистла, келыштарен, оҥайын модыч.

2-шо ужашыште Вячеслав Александровичын серыме почеламутшо-влакым лудмо конкурс эртаралте. 5-6 да 7-8 классласе тунемше-влак тӱрлӧ почеламутлам каласкалышт. Тыгодым мимикым, йӱк вашталтышым шотыш налын, теме ден идейым колыштшо дек намиен шукташ тыршеныт. Иктешлымеке пале лие: сай гыч эн сайже ойыртемалтыч. Тиде – А. Ялкаев (3 кл.), С. Николкина (5 кл.), Ю. Зайнашева, А. Миронов (6 кл.), Д. Янгубаев (7 кл.) Е. Шамиева, Н. Ялкаева (8 кл.)

Мыят ынде ятыр ий сулен налме канышыште улам гынат, школемын лектышыж нерген эре палаш тыршем, тӱрлӧ вашлиймашлашке пагален ӱжмышт годым мияшак тыршем, йодмышт годым полшен шогем. Тау тыгай еҥ-влаклан, шочмо йылмынам, тӱвранам илыш кӱкшытыш нӧлталаш тыршымыштлан.

Л. РУСИЕВА.