Чеверын, Теле! Салам, Шошо!

Чеверын, Теле! Салам, Шошо!

Кодшо шуматкечын РДК ончылно калык лыҥ погынен. Эрдене изишак йӱштӧ нерым чывышталаш тӧчен гынат, пайремыш погынышо калыкым лӱдыктен огыл. Вет тыште йырым-ваш тамле шашлык пуш нерым чыгылтен, моло тутло кочкыш шкеж дек ӱжын. Коммерсант-влак площадь мучко палаткыштым шынденыт, тӱрлӧ сатум ужалаш луктыныт.

Ӱярнян тӱҥ чесшым - мелнам тамлен ончыдымо еҥже лийынат огыл, очыни. Вет площадь мучко тӱрлӧ организаций ден предприятий-влакын уста ӱдырамашышт-влак могай гына мелнам луктын огытыл. Тиде пайремлан йоча-влак поснак куаненыт. Вет моторын сӧрастарыме имне-влак, Емеля кугызан юзо коҥгаже нуным Мишкан урем мучко кондыштареныт.

РДК ончылно пайрем концерт эртен. Тыште Васли кува-влак, тӱрлӧ йомакысе герой-влак конкурслам эртареныт, сцена гыч сылне муро йоҥген. Районысо тӱрлӧ сельский поселений гыч толшо самодеятельный артист-влак шке мастарлыкышт дене куандареныт.

Кажне номерым ончышо-влак совым рӱж кырен вашлийыныт. Караидель район гыч мастар кидан еҥ писте гыч ыштыме теҥгыл-влакым, скандинавский ход дене кошташ тоя-влакым, вӱдварам, шӱдыр-влакым ужалаш луктын. Тудын сатужым налше-влак шукын лийыныт.

Пытартышлан телым ужатыме символ - чучелом йӱлатымаш лийын. Чеверын, Теле! Салам, Шошо!

Вениамин КОНДОГИН.