Чеверын, «Смена»!

Чеверын, «Смена»!

Тиде лагерь Шем теҥыз воктен Анапа олаште верланен. Башкортостан гыч 10 йоча каенна - Уфа, Салават, Ишимбай, Туймазы, Нефтекамск, Месягутово, Мишкан, Миловка гыч.

Ме поезд ден кок кече каенна. Москваште вес поездыш шинчынна. 24 январьыште «Смена» лагерьыш миен шуна. Лагерь пеш сӧрал верыште верланен. Йырым-йыр курык-влак нӧлтыныт, яндар теҥыз юж кумылым савырен, мланде чыла вереат ужарге лийын... Чыла тиде мемнам чылт ӧрыктарен. Икымше смена профессий дене кылдалтын да «Город мастеров» манылтын. Чылаже лагерьыште 20

отряд лийын - 34 регион гыч 450 йоча погынен. Мый 10-шо отрядыш логальым. Отрядлан «Молния» лӱмым шонен муна.

Отрядыштына Российын тӱрлӧ олалаж гыч 20 йоча лийын. Нуно Ставропольский край, Самара, Саратов, Липецк областьла гыч,

Екатеринбург ола гыч, Калмыкий, Башкортостан Республик гыч лийыныт. Кажне йоча 19 профессий кокла гыч иктым ойырен налын да смена мучко ямдылалтын. Мый электроникым ойырен нальым. Смена мучко «Битва профессий» фестиваль эртен. Тудо кум тур гыч шоген: ознакомительный, интеллектуальный да творческий. Лагерь илыш пеш оҥай: тӱрлӧ мероприятий, вашлиймаш, экскурсий-влак. Яра жапна йӧршын лийын огыл. Мӧнгӧ 12 шагат йудым гына йыҥгыртенна. Мемнан пеш весела да поро вожатый-влак лийыныт: Оля, Маша да Кирилл. Кажне эрдене зарядкыш куржталынна. Игече моткоч сай ыле, ме футболка дене гына коштынна. Оҥай шарнымашым

Салтак курыкыш, «Кандыра орыш» («Веревочный город») экскурсий-влак коденыт. Тыгак «Голос» шоун участникше Виктор Иванов ден вашлиймаш пеш оҥай лийын. Мероприятий-влак деч посна мемнан урок-влакат лийыныт. Тыгак мый футбол дене модаш коштынам. А кастене ме пӱтынь отряд дене Шем теҥыз воктек прогулкыш коштынна. Кажне кастене «сортатул» эртаралтын. Тушто йӱлышӧ сорта воктене ме шке шонымынам ойленна. Мый гитарым шоктенам, шуко у мурым пырля тунемынна. Шижынат ышна шукто - кок арня жап кок кечыла эртенат кайыш. Мый шуко у йолташым муым, шуко уым пален нальым. Мучаште икте-весына дене ойырлаш моткоч йӧсӧ ыле.

Кок арня жапыште ик еш гай келшен илаш тӱҥалынна. Сандене чыланат шортынна. «Смена» лагерь мыланем ӱмыр мучкылан поро шарнымашым коден. Пеш кугу таум каласынем самырык пӧлкан специалистше О. П. Биктубаевалан, класс вуйлатышем В. И. Муртазиналан да чыла туныктышем-влаклан мыланем тыгай сылне лагерьыш миен толаш йӧным пуымыштлан.

Сергей САЛИЕВ, 2 №-ан Мишкан кыдалаш школышто 8 в классыште тунемше.