Балтий кундем гыч уна-влак толыныт

Балтий кундем гыч уна-влак толыныт

Людмила Ямурзина Эстонийыште ила гынат, районын шочшыжо улеш. Таллин оласе марий ушемым вуйлата. Тудо тӱрлӧ эрвел марий йӱлам, вургемым, паша да семӱзгар-влакым шымла. Поснак кугу верым марий ӱдырамаш-влакын ожсо да кызытсе илышыштым шымлымылан ойыра, нунын койыш-шоктышыштым эстон ӱдырамашын койыш-шоктышышт дене таҥастара.

Ильдико Лехтиненат Мишкан районышто кумдан палыме шымлызе улеш. Тудо мемнан деке уже шымше гана толеш. Икымше гана мӱндыр 1984 ийыште шыжым толын улмаш. И. Лехтинен эрвел марий йӱлам ынде кумло утла ий шымла. Йылмынамат пала. Поснак кугу верым марий ӱдырамаш вургемым шымлымылан ойыра. Тиде – тудын ик эн йӧратыме пашаже.

Уна-влакым изарнян, администраций вуйлатышын заместительже Л. Александрова, марий историй да культура рӱдер вуйлатыше А. Ибулаев, чолга мер пашаеҥ Р. Ялаева ден верысе мушан Эсен Элай вашлийыныт. Тылеч вара Мишкан район МР администраций вуйлатыше П. Трапезников дене вашлиймаш эртен. Мутланыме годым район администраций вуйлатыше уна-влаклан пагален толмыштлан тау мутым ойлен да пашаштым сайын шукташ тыланен. П. Трапезников мутшо почеш, вес ийлан районым чыла могырчынат тӱзатен да турист-влаклан толаш келыштараш тыршыман.

Лидико Лехтинен эрвел марий-влакын акрет жапысе йӱлашт эн сайын аралалт кодмым паелмден да районысо калыклан тиде - моткоч шерге поянлыкым тӱткын аралаш да вияҥдаш тыланен.

- Мый ӱшанем, - ешарыш мутланыман годым И. Лехтинен, - марий-влак ончкыжымат шкеныштын йӱлаштым пагален илаш тӱҥалыт. Пагалымаш лиеш гын, тудым да шочмо йылмым шымлаш да вияҥдаш кумылан еҥ-влакат шочыт. А чыла тиде кугун ӱдырамаш-влак дечын шога. Вет икшыве-влак утларакшым авам ончен кушкыт. Шочмо йылме ден йӱлам пагалыше да йӧратыше аван икшывыже-влакат тугаяк лийыт...

Ильдико Лехтиненын тыланымашыжым кажне марийлан шотыш налман. Мемнан ончыкылыкна лач мемнан дечын шога.

В. КАМИЛЯНОВ.