Автосервисыш экскурсий

Автосервисыш экскурсий

«Путник» рўдерысе «Самырык водитель» йоча ушемын воспитанникше-влак шыже каникул жапыште Карамов Ю. Ф. ИП-н автосервисышкыже экскурсий дене миеныт.

Автомобиль дене тўзыкшє годым гына кошташ сай, пудырга гын, тудым олмыкташ куштылго огыл – шинчымаш ден чолгалык кўлыт. Сандене водитель-влак автосервисышке мият да техникыштым мастер-влаклан ўшанен пуат.

Самырык картингист-влак картингын устройствыжым сайын палат, тудым шкат олмыктен кертыт. Нуно тиде кечын автомастерскойын пашаж дене палыме лийыныт. Вет икмыняр ий гыч нине рвезе-влак шкат водитель лийыт.

Кружокышко коштшо рвезе-влакым автосервисын пашаж дене Юрий Карамов палдарен. Тудо тунемше-влаклан автоподъемникым, тўрлє оборудованийым, варитлыме аппаратым ончыктен. Картингист-влак тудлан тўрлє йодышым пуэныт да мастер деч чыла йодышланат раш вашмутым колыныт. Ю. Карамов, кўлеш лиеш гын, картинг-влакымат олмыкташ полшаш сєрен.

Кружокышко коштшо рвезе-влаклан австосервисышке экскурсий моткоч келшен. Нунын лўм дене мый Юрий Федоровичлан чон гыч лекше тау мутым ойлем.

И. ЯЛАЕВ.