«Афган курымешлан шӱмеш кодын»

«Афган курымешлан шӱмеш кодын»

Афганистанын ветеранже-влак районный мер организаций вуйлатыше Венер Фатхинуров дене мутланыме годым чылажымат шке шинча дене ужмыла чучо: кузе черет ден бронетранспортёр, танк-влак да моло техника эртат, мардежыште йошкар тисте-влак ловыкталтыт, салтак-влак броняште шинчат… А кӱвар йымалне куаш Пяндш йога. Салтак-влак чыланат пиалан улыт, вет нуно шочмо элышкышт таза-эсен пєртылыт.

В. Фатхинуров тиде кечым, ту жаплан армий гыч 7 ий ончыч пӧртылын лийын, эше кугурак куан дене вашлийын.

- Мылам пиал шыргыжын, мый шочмо вер-шӧрышкем таза-эсен пӧртылынам, - ойла Венер Фанилевич.

Тыматле койышан улмыжлан кӧра, тудо Афганистанысе службыж нерген шуко ыш ойло. Мыняр йодыштынам гынат, пырля служитлыме йолташыже-влак, воин-интернационалист-влак советын пашаж нерген веле ойлен.

Воин-афганец-влак ушем районыштына Совет войскам Афганистан гыч лукмо деч вара виклан, манаш лиеш, 1989 ийыште шочын.

Тиде жап гыч кумло ий эртен. Но афган сарын ветеранже-влаклан чылажат теҥгече лиймыла чучеш. Нуно тиде сарыште мыняр вўрым

йоктарымым, мыняр йолташым йомдарымым але мартеат шарнен илат.

- Ме тиде сарыште 13 тўжем утла салтак ден офицерым йомдаренна, - ойла В. Фатхинуров. – Тынаре еш армий гыч шкенжын эргыже пӧртылмым вучен шуктен огыл. Ятыр ача-ава, иза-шольо, ака-шӱжар лишыл еҥыштым йомдареныт.

Тиде сарым мондыдымашын, чыла вереат воин-интернационалист-влак ушемлам ыштыме. Мемнан район гыч тиде шучко сарышке 77 еҥ логалын. Нунын кокла гыч кок еҥже илыше пӧртылын огыл. Вячеслав Муртазин ден Анатолий Илинбаев кредалмаш пасушто вуйыштым пыштеныт.

А вес землякна Валерий Яметов увер деч посна йомын. Тек нуно чыланат волгыдо верыште лийышт. - Венер Фанилевич, изишак

районысо афганец-влак ушемын пашаж дене палдарыза.

- Афган сарын ветеранже-влак икте-весышт коклаште пеҥгыде кылым кучат. Мемнан чыланнанат шӱм-чонна але мартеат коржеш, но илыш умбакыже шуйна. Ме шоҥгемына, элнам ончыкыжым самырык тукымлан аралаш перна. Тидлан кӧра ме школлаште самырык рвезе-влакым лӱддымӧ да патриот шӱлышан сарзе лияш туныкташ тыршена. Чӱчкыдын ОБЖ, тыныс уроклашке да моло мероприятийлашке миена.

Ме республикыштына эн ончыч, манаш лиеш, воин-интернационалист-влаклан памятникым шогалтышна. Сай примернам пошкудо-влакат кӱсынлышт.

- Вашке районыштына «Афганистаныште шуаралтше-влак» книга презентаций эрта. Тиде книга денат изишак палдарыза. - «Афганистаныште шуаралтше» книгам краевед, районысо самырык-влак ушемлан ончылеҥышт-влак возеныт. Тиде книга вашке ош тўням ужеш. Тудо кум ужаш гыч шога. Икымше кжашыштыже афган сар нерген тӱрлӧ фотографий-влак гыч шога.

Кокымшо – фотографическо-библиографический ужашыште воин-афганец-влакын фотографийыштым вераҥдыме да шкешт нерген возымо. Книган кумшо ужашыже «Ветеран-влак теҥгече, таче да эрла» манылтеш.

Мый Совет войскам Афганистан гыч лукмо кече вашеш воин-интернационалист-влак ден нунын лишыл еҥыштлан пеҥгыде тазалыкым, волгыдо пиалым да тыныс илышым тыланем.

Вениамин КОНДОГИН.